O Xulgado do Social nº1 de Ferrol vén de revogar a sanción de suspensión de emprego e soldo dun mes á traballadora eventual de Correos que presta os seus servizos na zona do Seixo, dependente da Oficina de Fene. Correos deberá reporlle o salario de 1.301 euros que deixou de percibir no mes de abril, cando se cumpriu a sanción.

Medio cento de técnicos superiores e de técnicos en coidados auxiliares de enfermaría do SERGAS mobilizouse o 23 de xuño no Hospital Arquitecto Marcide en demanda dunha reclasificación xusta dos seus postos. Os e as traballadoras trasladaron as súas protestas nunha marcha desde o despacho de Recursos Económicos até o de Recursos Humanos. CIG-Saúde convocou ese día concentracións simultáneas en todos os hospitais públicos do país.

A CIG de Ferrol solicita a intervención do Ministerio Fiscal en Eshor por unha “fraude masiva aos traballadores, a Facenda e á Seguridade Social”, pois a construtora obriga a asinar baixas voluntarias a moitos dos seus empregados estranxeiros e despide aqueles que sofren un accidente laboral ou caen enfermos.

A dirección comarcal da CIG de Ferrol acordou, na súa xuntanza do 15 de maio, facer un chamamento á participación na concentración convocada para o próximo día 10 de xuño ás 8:45 horas, diante dos xulgados, baixo o lema “Eshor abusa das/os traballadoras/es. Contra a explotación laboral: traballadores/as do mundo unidos”. A convocatoria de concentración coincide cun xuízo pola denuncia dun traballador inmigrante contra a empresa, que “se ten caracterizado nos últimos tempos por ter unha posición belixerante contra da nosa Central Sindical”, explican.

Ferrol viviu un feito insólito na tarde do 15 de maio. A construtora Eshor organizou unha protesta fronte ao local da CIG na que mobilizou algo máis dun centenar de traballadores, na súa inmensa maioría inmigrantes. A empresa fretou un autobús e varias furgonetas para trasladar obreiros desde Madrid a Ferrol.

O pasado 6 de maio celebrouse en Ferrol a homenaxe á compañeira sindicalista Marga Bellas. No acto, organizado pola Asociación de Migrantes de Ferrolterra (ASMIREFE), da que ela foi fundadora, lembrouse o seu activo papel a prol da integración das mulleres e homes migrantes na comarca, alén do seu compromiso como sindicalista da Confederación Intersindical Galega.