Con motivo da situación pola que estan a pasar as traballadoras e traballadores da lousa, constutuíse un comité organizador de eventos deportivos en apoio destas compañeiras e compañeiros que nestes momentos se atopan sen traballo. Disputaranse tres encontros deportivos do 4 ao 8 de decembro, aos que se pode asistir cun bono único de dez euros, que se pode mercar nos locais das centrais sindicais.

Integrantes do comité de empresa da UTE-Langosteira (encargada da construción do porto exterior da Coruña) e membros da CIG cortaron, desde as 07:00 até as 09:30 horas do 11 de novembro, os accesos ás obras da nova dársena e retrasaron a incorporación da quenda da mañá hora e media, en protesta polo despedimento de oito obreiros.

O Tribunal Superior de Xustiza de Galiza (TSXG) declarou improcedentes os 30 despedimentos de operarios da planta de Ingemarga en Guitiriz que foran botados pola empresa por negárense a traballar as fins de semana. O fallo xudicial ordena Ingemarga a readmitilos nos seus postos co conseguinte abono dos salarios de tramitación. De non aceptar esta opción, a empresa tería que indemnizalos e desembolsar preto dun millón de euros.

A CIG-Ourense denunciou diante da Inspección de Traballo e da Seguridade Social que nas reformas do edificio do Banco Gallego desta cidade se están a incumprir as medidas de saúde laboral, no que ten a ver co tratamento do amianto. Etelvino Blanco, secretario comarcal da CIG de Ourense, subliña que como consecuencia do desentullo, estanse a retirar tubarias e placas de fibrocemento (con elevado contido de amianto) que son cortadas e destruídas son medida de protección algunha e depositadas nun contedor de obra que hai na vía pública

A Federación da Construción e Madeira da CIG de Pontevedra convocou unha rolda de prensa o venres 17 de outubro ás 12 no local comarcal sindical para presentar a Asociación de Canteiros de Poio, constituida por alumnos e ex alumnos da Escola de Canteiros. A criación desta asociación débese á necesidade de loitar para acadar a homologación do titulo profesional expedido por dita escola.

Máis de 1.500 persoas mobilizáronse o domingo 12 de outubro desde as doce da mañá en Catoira contra o expediente de regulación de emprego exposto pola dirección da fábrica de cerámica de Cedonosa situada neste concello pontevedrés. A mobilización estaba convocada polo Comité de empresa, CIG, CCOO e UGT, e contou co apoio masivo do pobo de Catoira, que volveu encher as rúas desta vila en defensa dos postos de traballo e pola viabilidade desta empresa.