A dirección da empresa “Top Rank”, multinacional inglesa propietaria do bingo “Ciudad de Santiago”, readmitiu a traballadora despedida no mes de xullo de forma improcedente, logo de varias xornadas de mobilizacións diante das portas deste negocio. Se ben é certo que nesta empresa houbo tres despedimentos, dous dos traballadores admitiron a indemnización proposta. Porén, a empregada non aceptou a improcedencia do seu despedimento e proseguiu na loita pola súa readmisión, que finalmente conseguiu.

Celta Prix, empresa concesionaria do servizo de recollida do lixo e da limpeza nos concellos de Meis, Cambados e Vilanova de Arousa, despediu dous traballadores en canto tivo coñecemento de que ían ser candidatos da CIG nas eleccións do persoal. A central nacionalista, que esixe a readmisión inmediata dos compañeiros, denunciou este caso de represión sindical nos xulgados do Social.

A asemblea de traballadores do servizo de limpeza e recollida de lixo de Cedeira ratificou, o 8 de agosto, o preacordo asinado entre a empresa Celta Prix e a representación sindical sobre o primeiro convenio colectivo. A CIG-Servizos cualifica o acordo como plenamente satisfactorio ao acadar a práctica totalidade das reivindicacións do persoal. A folga ficou desconvocada.

CIG-Servizos de Ferrol convocou unha folga indefinida no servizo de recollida do lixo e limpeza viaria do Concello de Cedeira, que comezará ás 23:59 horas do 8 de agosto. As reivindicacións pasan por rematar coa discriminación salarial entre o persoal contratado e o subrogado do Concello. Os primeiros están a cobrar pouco máis do salario mínimo interprofesional.

Traballadores do Bingo “Ciudad de Compostela” xunto con compañeiros da CIG, apoiados por delegados e delegadas sindicais de varias empresas de Santiago permaneceron ás portas da Sala desde as 16:00 até as 03:00 horas do pasado venres día 1 de agosto. Tal e como fixeron nas dúas xornadas de mobilización anteriores informaron aos clientes da situación laboral na empresa e pedíronlles que ese día non entraran no local de ocio.

O luns día 4 de agosto reincorpóranse aos seus postos de traballo as traballadoras da exposición permanente Galicia Dixital que foran despedidas o pasado mes de maio tras pasar a xestionar a mostra a nova concesionaria, Telecyl S.A. Foron necesarios máis de dous meses de constantes mobilizacións para que se chegara a un acordo e foran readmitidas.