Importante perda de poder adquisitivo nos salarios dos traballadores ourensáns pola escandalosa suba do IPC

O Índice de Prezos ao Consumo (IPC) establece a taxa anual do 2007 no 4,3% segundo os datos adiantados polo Instituto de Estatística. Esta forte suba que ten como base o encarecemento de produtos básicos de consumo representa unha importante perda de poder adquisitivo.

Esta perda de poder adquisitivo ten unhas consecuencias máis graves para os salarios dos traballadores e traballadoras, especialmente naqueles con rendas máis baixas, como son os dos ourensáns que son dos máis baixos do Estado, e tamén aos que non teñen recollida no convenio cláusula de revisión salarial. (Foto: ©galizacig.com).

Esta perda ten unhas consecuencias máis graves para os salarios dos traballadores e traballadoras, especialmente naqueles con rendas máis baixas, como son os dos ourensáns que son dos máis baixos do Estado, e tamén aos que non teñen recollida no convenio cláusula de revisión salarial.

Dos 18 convenios provinciais de sector só tres teñen establecida cláusula de revisión salarial en base a suba do IPC. Son os de Construción, Hostalería e Fabricantes de Móbeis cuxa revisión consiste en aplicar sobre os salarios actuais unha porcentaxe no exceso do 2%. polo que son só uns 12.000 traballadores e traballadoras os que teñen garantido o poder adquisitivo o que representa un número moi baixo de asalariados.

Incremento inferior ao 3,5%

Os demais convenios tiveron incrementos con unha media inferior ao 3,5 % aos que hai que engadir os miles de empregados públicos e outros de convenios de ámbito estatal e de empresa que tampouco teñen dereito a revisión de salarios.

O secretario comarcal da CIG de Ourense, Etelvino Blanco, sinala que “a previsión de IPC do 2 % establecida polo goberno é un engano para reducir os incrementos salariais na negociación colectiva polo que temos que insistir na necesidade de conseguir na negociación dos convenios incrementos reais de salarios, que non sexan absolvidos por unha suba escandalosa dos prezos e asegurar eses incrementos con cláusulas de revisión salarial adecuadas”.

Así mesmo, Blanco engade que “debemos criticar unha vez máis a inexplicábel política de moderación salarial que pratican os outros sindicatos e que contribúe a beneficiar aos empresarios e prexudicar gravemente os intereses económicos dos traballadores e traballadoras”.