Presidencia permite o despedimento das 11 traballadoras da exposición Galicia Dixital

Galicia Dixital comezou a súa andaina no ano 2000. Até o día de hoxe, tres empresas diferentes obtiveron a concesión para encargarse da mostra. En todos os casos, ao longo destes 8 anos, as traballadoras (10 traballadoras e un traballador) mantiveron o seu posto, ou o que é o mesmo, foron subrogadas.

Porén, a comezos do mes de maio, a nova concesionaria, Telecyl S.A, faise coa concesión, négase a subrogar ao persoal e as traballadoras van ao paro. “Non entendemos que é o que pasou aquí. Se anteriormente houbo tres empresas e en todos os casos se fixeron cargo do persoal, tal e como se requiría nos pregos- por que esta empresa non o quere facer? O que nos contestan tanto da Xunta como desde a empresa é que neste caso o prego de condicións non exixe a subrogación”, explica Roberto Alonso, responsábel comarcal da federación de Servizos da CIG.

Porén, esta xustificación é, para a CIG, falsa. Aínda que nos pregos de condicións anteriores si que figuraba expresamente a obriga de subrogar ao persoal, neste último si que indica que a empresa adxudicataria virá obrigada a respectar as normas e convenios en vigor que houbera anteriormente. Unha desas normas en vigor, sería o dereito adquirido da subrogación, tal e como se fixo nas anteriores ocasións.

Empresa de telemarketing

Para a CIG-Servizos, o proceso é moi sospeitoso xa que estamos a falar dunha empresa descoñecida no sector, de Valladolid, que se dedica a telemarketing e á industria editorial. O prego de condicións exixe, segundo Alonso, experiencia probada no sector de exposicións e congresos nos últimos tres anos e contar con persoal debidamente formado para o labor a desenvolver (guía da exposición), en concreto, cun mínimo de 8 traballadoras/es. A CIG intentou comprobar a experiencia requirida no caso desta empresa. “Non atopamos nada relevante a non ser a actividade como teleoperadora e como editorial. Canto ao persoal, polo que puidemos comprobar, non había –o pasado sábado día 10 de maio- o persoal mínimo requirido no prego, que serían oito persoas”.

Para a CIG tamén resulta rechamante que para unha contrata de dous anos se presuposten preto de 600.000 euros, cando os únicos gastos que hai son as nóminas do persoal, porque o resto do material de traballo depende da Xunta de Galiza.

Diante destes datos, a CIG pregúntase cales son as razóns reais que levaron a outorgar a concesión a esta empresa e, sobre todo, por que hai tanto interese por eliminar ao persoal que traballaba na exposición até o de agora. Máis tendo en conta a súa probada profesionalidade e experiencia logo de oito anos de traballo continuado na mostra.

Roberto Alonso tamén cuestiona o interese deste chamado goberno de progreso e nomeadamente da consellaría de Presidencia, por garantir, como din, a estabilidade laboral e a creación de emprego feminino, cando aquí se eliminan dun plumazo 10 postos de traballo ocupados por mulleres. Alonso matiza que, “non vale que deriven a responsabilidade das contratacións na empresa concesionaria. A administración pública debe facer cumprir a normativa vixente e dar exemplo fomentando a estabilidade no emprego”.