A construtora Extraco négase a adecuar a xornada dunha traballadora para que poda levar ao fillo á garderia

Os traballadores de Extraco, empresa que se ocupa do mantemento e Conservación das Estradas do Sur de Pontevedra mediante concesión por concurso público da Consellería de Política Territorial, están en folga dende o 10 de setembro porque a empresa se nega a cumprir o pacto acadado despois dun largo conflito, mediante o cal acordábase, entre outras cousas, que a traballadora que realiza as funcións administrativas tería xornada continuada (de 8 a 16 horas), para poder levar ao seu fillo pequeno á gardería.

Agora a empresa pretende que a citada traballadora realice a sua xornada igual que o resto dos traballadores, esto é de 7,30 a 15,30 horas, o que, por media hora, impediría que ela poida atender o seu fillo, co que se vería obrigada a abandonar o posto de traballo.

A CIG e o resto de traballadores da empresa, considera que "esta posición é un castigo á citada traballadora e unha vulneración do dereito á conciliación da vida laboral e familiar, xa que non existe ningún tipo de razóns produtivas para que a traballadora non poida flexibilizar en media hora a sua xornada laboral. De feito esta xornada é a que realiza habitualmente os venres. Entendemos que EXTRACO discrimina a esta traballadora pola sua maternidade, feito que consideramos intolerábel".

Política Territorial non responde

Ademais, desde a Federación da Construción da CIG engaden que "tamén queremos mostrar o noso malestar pola actitude mostrada pola Delegada Provincial da Consellería de Política Territorial, quen até o de agora non recibiu aos traballadores a pesares de coñecer a situación e o agravio e desprezo pola lexislación sobre a igualdade que representa esta posición empresarial".

Ante esta situación, a CIG convoca o martes 16 de setembro aos traballadores a concentrarse diante do edificio da Xunta de Galiza en Vigo ás 11,30 horas para reclamar que se escoiten as súas demandas.