O BNG remite á presidencia un escrito sobre a expulsión dos representantes da CIG cando ían atender aos medios de comunicación

Tal e como relata no escrito o deputado nacionalista, a Confederación Intersindical Galega tiña informado aos medios de comunicación da súa entrega no rexistro da Cámara dunha iniciativa lexislativa popular relativa á retribución dos altos cargos mais, cando chegaron ao recinto os servizos da Cámara indicáronlles que “por orde da presidenta, a atención aos medios tiña que realizarse fóra do recinto parlamentar”.

Aymerich lembra que ésta non é a primeira vez que se viven feitos semellantes e apunta que nesta mesma lexislatura, impedíuselle tamén ao presidente e a membros da Mesa pola Normalización Lingüística atender aos xornalistas no Parlamento impedimento que, “por certo, semella non ser de aplicación a ourtas asociacións ou persoas”.

O portavoz nacionalista explica no escrito que “alén do tópico, o Parlamento é a casa de todos e todas, tamén das organizacións nacionalistas” e, xa que logo, reclama que feitos deste tipo non se volvan producir.

O BNG entende, tal e como indica Carlos Aymerich, que non existe motivo algún para impedir feitos que “non entorpecen de ningún xeito o funcionamento normal da Cámara”.