Declaran nulo o despedimento do traballador dunha gasolineira coruñesa que se acollera a un permiso de paternidade

O Xulgado do Social número 3 de A Coruña ditou unha sentenza que declara a nulidade do despedimento dun traballador da “Estación de Servicio Bens S.L.”, que a empresa botou despois de se acoller a un permiso por paternidade. O fallo obriga a gasolineira a readmitilo e a pagarlle os salarios de tramitación.

Concentración fronte a esta gasolineira organizada pola CIG o pasado 28 de febreiro.

A sentenza, á parte de declarar a nulidade do despedimento coa conseguinte readmisión do empregado no seu posto e nas súas condicións de traballo, obriga a gasolineira a aboarlle os salarios de tramitación até o día que se produza a readmisión, cantidade que, a día de hoxe, ascende aos 4.670 euros.

Ernesto López Rei, responsábel comarcal da CIG-Transporte, felicítase por este fallo xudicial porque o despedimento atentaba contra a lexislación actual en materia de igualdade de oportunidades entre mulleres e homes e violaba os dereitos fundamentais e as liberdades públicas do traballador.

Por outra banda, López Rei considera que esta resolución xudicial pon en evidencia a delegada provincial da Consellaría de Traballo, María Debén, que se inhibiu durante todo o caso e ignorou todos e cada un dos requirimentos que lle fixera a CIG para que actuase. Do mesmo xeito, o representante da CIG-Transporte censura a Inspección de Traballo por ter emitido un informe que avalaba a actuación empresarial.

Os responsábeis da gasolineira non lle recoñeceron ao traballador o dereito a gozar do permiso de paternidade e, ademais, negáronlle a documentación necesaria para tramitalo diante da Seguridade Social. O empregado, que levaba seis anos traballando na gasolineira, foi despedido o pasado 22 de febreiro cando pretendeu incorporarse ao seu posto tras gozar do período legal de 13 días de suspensión de contrato por paternidade.

Nova relacionada:

Despiden un empregado por gozar do permiso de paternidade