Compostela, 18/11/2008

imprimir

Esta obra está baixo unha licenza de Creative Commons.

: CIG-Servizos : : convenio colectivo : : seguridade privada :

A CIG optará pola mobilización se a patronal non inclúe as demandas fundamentais dos/as traballadores/as

Iniciadas as negociacións para un novo convenio de Seguridade Privada

A patronal do sector de seguridade privada manifestaba, na última xuntanza da mesa negociadora do convenio, o pasado 11 de novembro, a súa negativa a abordar cuestións económicas e a aceptar a proposta dun incremento salarial do IPC máis dous puntos, sob pretexto da situación provocada pola crise económica. Para a CIG-Servizos esta posición é inadmisíbel e xa anunciou que de manterse optará pola mobilización.

Imaxe das mobilizacións protagonizadas pola CIG durante a negociación do anterior convenio.

A negociación albíscase especialmente complicada, porque APROSER (Asociación Profesional de Compañías Privadas de Servizos de Seguridade) ten ameazado na propia mesa, con dous anos sen convenio e sen suba salarial, como xa ocorreu nos anos 90.

A CIG responsabiliza ás centrais sindicais UGT, CCOO e USO de manter unha posición pusilánime fronte á “chulería” da patronal, de ter deixado aparcado o problema das horas extra e de non presentar, por vez primeira na historia deste convenio plataforma.

Polo que respecta ás horas extra, desde a federación de Servizos presentárase unha proposta de creación dun plus mensual de 200 euros repartido nas 15 pagas que absorbera as posíbeis reclamacións de horas extra para que, unha vez compensado, quedara consolidado no salario base. Malia ter asumido inicialmente a proposta, estes sindicatos non só esqueceron o tema senón que racharon a unidade de acción sindical presentando unha proposta sen contar coa CIG.

Diante destas actitudes a CIG-Servizos considera imprescindíbel acadar, de forma urxente, un convenio galego para o sector e adianta que loitará por un convenio digno e con dereitos.