Traballadores despedidos de “Ullacargo” protestarán a diario até que a empresa lles pague

Sete traballadores despedidos da empresa de transportes “Ullacargo” aínda non cobraron as indemnizacións, que ascenden a un total de 50.000 euros, pese a que perderon o seu posto hai xa máis de dous meses. De non haber unha resposta inmediata as súas demandas, os operarios protestarán diariamente, en Bens (A Coruña), fronte ás instalacións de “CLH”, empresa de almacenamento de hidrocarburos que é un dos principais provedores de “Ullacargo”.

Protesta fronte ás instalacións de CLH, unha das principais empresas nas que presta servizo Ullacargo, celebrada o 21 de agosto en Bens (A Coruña).

As indemnizacións a cada un dos traballadores despedidos oscilan entre os 5.000 e os 18.000, dependendo da súa antigüidade na empresa. Os operarios proceden de comarcas como a Costa da Morte ou O Salnés e Ullacargo ten a súa sede social en Vedra, na comarca de Compostela.

Os despedimentos dos sete empregados foron improcedentes e a empresa se comprometeu no Servizo de Mediación, Arbitraxe e Conciliación (SMAC) a aboarlles as indemnizacións antes descritas. Ernesto López Rei, responsábel comarcal da CIG-Transporte, entende que a compañía puxo como escusa a crise económica para despedir os operarios e “agora alega non ter cartos para pagarlles as indemnizacións".

A primeira das protestas desenvolveuse en Bens o 21 de agosto e nela participaron, alén dos despedidos, sindicalistas da CIG. A concentración fronte as instalacións de CLH estendeuse durante toda a mañá. No lugar houbo unha importante presenza policial ao acudir tres coches patrulla e varios axentes de paisano.

A última hora da mañá, catro dos responsábeis de Ullacargo desprazáronse até Bens para falar cos traballadores despedidos e cos representantes da CIG-Transporte, convocante da protesta. Os empresarios amosaron unha actitude desafiante e aseguraron que varios dos operarios xa cobraran, extremo que foi desmentido polos propios traballadores. Un dos xefes mesmo ameazou con demorar aínda máis os pagamentos e comezou a fotografar os asistentes á concentración, ao afirmar que “os denunciaría”.