A CIG denuncia a situación dos Inspectores de Pesca na Galiza diante das institucións europeas

Desde o 16 de maio os inspectores de pesca galegos secundan un paro parcial indefinido, polo que só realizan a inspección de pesca marítima en horario de mañá.

Demandan unha mudanza nas súas condicións laborais, horarios, e un incremento do número de persoal que realiza estes labores, xa que cuestións como o control das descargas que se fan nos portos, ou a loita contra a pesca ilegal e control das importacións de peixe, resulta máis que complicado na actual situación.

Inspección de pesca só de mañá

O día 16 de maio de 2008 o colectivo de Inspectores de Pesca Marítima dependentes do Ministerio de Medio Ambiente e Medio Rural e Mariño do goberno español encetou un paro parcial indefinido, convocado pola CIG no ámbito territorial da Galiza, consistente en cumprir o horario que a Administración ten regulado para estes postos de traballo, é dicir, facer a xornada de traballo entre as 07:30 e as 15:30 horas, de luns a venres. Con anterioridade a esa data e dende comezos de 2007, os servizos de Inspección Pesqueira de varias provincias, xa mantiñan esta xornada de traballo sendo nulo o número de inspeccións feitas fóra do horario de mañá. Os servizos mínimos, establecidos pola Administración para este paro, fan referencia a un 10% da actividade habitual de inspección; mais aló destes servizos mínimos, os Inspectores de Pesca Marítima non realizan inspeccións de pesca en horario de tarde, noite ou fin de semana.

O motivo dá convocatoria do paro radica na falta de organización do traballo da Inspección de Pesca que redunda nunha ineficaz actividade inspectora e na vulneración dos dereitos laborais dos funcionarios que ocupan postos de Inspector de Pesca Marítima.

Só após a convocatoria do vixente paro parcial indefinido, a Administración decidiu negociar a regulación horaria. Negociación que actualmente está rota ante a reiterada e tallante negativa da administración a establecer Dispoñibilidade Horaria para o posto de Inspector de Pesca Marítima, baseada no argumento de que é innecesaria para o funcionamento do Servizo.

Esixencias da CIG

Tendo en conta as funcións de control da Comisión Europea sobre a inspección pesqueira dos Estados Membros, a CIG-ADMÓN. PÚBLICA, esixe:

- Que a Comisión valore se é eficaz o control e inspección da pesca baseados en horarios non axustados aos da actividade pesqueira, que non contemplan dispoñibilidade horaria que permita inspeccionar a flota e importacións de peixe con ocasión da súa entrada a porto ou desembarque.

- Que a Comisión comprobe a idoneidade do número de Inspectores de Pesca Marítima de que dispón o estado español na Galiza.

- Que a Comisión verifique se os Inspectores Comunitarios da lista comunicada polo estado español cumpren os requisitos establecidos polo artigo 5 do Regulamento 1042/2006.

- Que a Comisión inspeccione a totalidade do control pesqueiro realizado polo Estado incluíndo as inspeccións realizadas polo persoal da Garda Civil e Armada españolas, que non reciben ningunha misión de inspección comunitaria.

- Que a Comisión, no marco da loita contra a pesca ilegal, verifique o grado de control das importacións de peixe no Estado.

- Que a Comisión avalíe a eficacia e o grado de cumprimento do Programa español de Control do atún vermello e a súa adecuación ao Plano de Recuperación (Regulamento 1559/2007) e ao Plano de Inspección (Decisión 2008/323/CE) desta especie.

- Que a Comisión comprobe o número e calidade das inspeccións pesqueiras feitas polo estado español dende marzo de 2007 e especialmente as realizadas en horario de tarde, noite e fin de semana, dende o 16 de maio de 2008.

Por todo isto, a CIG solicita que se programen á maior brevidade posíbel as visitas de inspección necesarias para comprobar o exposto na presente denuncia e que se adopten as medidas oportunas para asegurar a eficacia do control e inspección pesqueiros en cumprimento da normativa pesqueira e das responsabilidades asumidas polo estado español e a Unión Europea.