Concéntranse ante a Xoiería Cerqueiro en demanda da readmisión dos catro traballadores despedidos do taller

Hai aproximadamente tres meses, o propietario do taller de xoiería Cerqueiro contactaba cos catro traballadores e máis coa CIG para negociar a proposta de presentación dun Expediente de Regulación de Emprego (ERE) que consistiría en que, en diante, dous dos traballadores pasarían ao paro durante seis meses e logo serían recontratados para pasar ao paro os outros dous.

Tras estudiar a situación económica da empresa, CIG e traballadores concluíron que esta decisión non estaba xustificada e rexeitaron a proposta. Porén, o empresario mantivo a súa decisión e presentou igualmente o ERE á consellaría de Traballo, que tampouco o aceptou.

Malia iso, o pasado luns 22 de setembro os catro traballadores recibían unha carta de despedimento e a comunicación do empresario de que non tiña cartos para afrontar a falta de preaviso, as indemnizacións por despedimento nin o pagamento dos salarios deste mes.

O taller de Cerqueiro leva 18 anos funcionando con total normalidade, sen problema económico algún, cumprindo o convenio e sen que, en todo ese tempo, se produciran atrasos nos pagamentos das nóminas, pagas extra... Agora os traballadores non lles queda outra que mobilizarse para reclamar os seus dereitos e a readmisión nos postos de traballo.