Case medio milleiro de persoas asistiu ao ciclo de cinema obreiro "Saíndo da fábrica"

Unhas 450 persoas asistiron ao longo do mes de maio ás diferentes proxeccións de filmes dentro do ciclo de cinema obreiro "Saíndo da fábrica", que organizou a CIG - Servizos no Forum Metropolitano de A Coruña. Esta exitosa iniciativa cultural repetirase o vindeiro ano.

Adolfo Naia, acompañado das concelleiras de Igualdade (á esquerda da imaxe), Cultura (centro) e da fotógrafa Konstanze Schmitt.

A boa acollida que tivo o ciclo non sorprendeu ao seu coordinador, o membro da CIG-Servizos Adolfo Naia: "Isto demostra que en A Coruña existe un público sensíbel e comprometido co cinema onde os protagonistas son os traballadores”.

O próximo ano, adianta Naia, "tentarase traer algún director de cinema para as charlas-debates dos venres e seguirán participando traballadores relacionados cos temas das películas". Cómpre lembrar que nesta edición, que contou con debates moi animandos nos que o público participou intensamente, tomaron parte sindicalistas como o secretario nacional da Federación de Servizos da CIG, Paulo Rubido; o presidente do comité de empresa de Zara Logística, Roberto Pérez Vila, ou o avogado laboralista José Luis Muruzábal.

O coordinador do ciclo quere amosar a súa gratitude ás persoas que participaron nas charlas e no resto das sesións, así como ao Forum Metropolitano, á Concellaría de Cultura de A Coruña e á Federación de Servizos da CIG.