A CIG volve gañar as eleccións en Zara Logística

A CIG volveu gañar as eleccións ao comité de empresa de Zara Logística ao conseguir 8 delegados, fronte aos 7 da CUT, aos 5 de CCOO e aos 3 de UGT. O sindicalismo nacionalista afiánzase nesta compañía do Grupo Inditex, en clara contraposición ás centrais españolas, que retrocederon. A participación aproximouse ao 90%.

Roberto Pérez Vila, presidente do comité de empresa de Zara Logística e delegado da CIG.

Os presentes resultados adquiren unha especial relevancia para a CIG, posto que subiu en votos e un delegado con respecto ao último proceso electoral que se celebrou hai catro anos. Ademais, por primeira vez na historia dunha empresa do Grupo Inditex, unha central que non é CCOO nin UGT logra presentar candidatura e conseguir representación no Colexio de Técnicos e Administrativos, que representa o persoal de oficinas e os mandos intermedios.

Outra conclusión que se desprende destas eleccións é o desgaste que sufriron CCOO e UGT. A partir de agora, o papel do sindicalismo estatal no comité de empresa de Zara Logística vai ser irrelevante.

Roberto Pérez Vila, actual presidente do comité de empresa e cabeza de lista da CIG, considera que estes resultados son unha boa mostra da confianza que depositaron os traballadores no sindicato nacionalista polas melloras salariais e laborais atinxidas nestes últimos catro anos. “O comité vai ser forte e farase respectar diante da empresa”, adianta.

	Colexio de Especialistas		Colexio de Técnicos e Administrativos		TOTAL
	Votos	Delegados	Votos	Delegados	Votos	Delegados
CIG	290	7	33	1	323	8
CUT	276	7	-	-	276	7
CCOO	132	3	83	2	215	5
UGT	93	3	-	-	93	3