A Coruña, 6/3/2008

imprimir

Esta obra está baixo unha licenza de Creative Commons.

: 10 de marzo : : carestía da vida : : manifestación :

A Unión Comarcal considera un insulto á clase traballadora galega a visita que o monarca español realizará á cidade este día

A manifestación de Ferrol será o acto central da CIG o 10 de Marzo

A tradicional manifestación de Ferrol será de novo o acto central da CIG o 10 de Marzo, Día da Clase Obreira Galega. A marcha partirá ás 19:30 horas do local do sindicato e rematará no Cantón despois de percorrer varias rúas do centro da cidade. A Unión Comarcal manifesta o seu total rexeitamento á visita que o monarca español fará a Ferrol neste día tan sinalado para os traballadores do país.

Presentación da manifestación do 10 de marzo en Ferrol

X.A. López Pintos, secretario comarcal de Ferrol, e Fran Cartelle, secretario comarcal de Organización, durante a roda de prensa na que se presentou a programación do 10 de Marzo. (Foto: ©galizacig.com 05/03/2008).

A Unión Comarcal considera que a presenza dos reis de España este día en Ferrol é un insulto á clase traballadora galega e á memoria das vítimas da represión de 1972. “Foi o franquismo quen nomeou o monarca como sucesor”, recorda o secretario comarcal, Xesús Anxo López Pintos.

As reclamacións do Marco Galego de Relacións Laborais e da soberanía nacional estarán presentes con forza na manifestación do 10 de Marzo, así como a reivindicación de salarios dignos e a denuncia da carestía da vida. A este respecto, a CIG-Ferrol manifesta que quen sofren as consecuencias da precariedade e dos prezos elevados “son as familias reais e non a que nos vai visitar o 10 de Marzo, que vive do Estado e dos contribuíntes”.

A programación do 10 de Marzo en Ferrol complétase cunha asemblea de delegados e delegadas ás 10:00 e coa ofrenda floral, ás 11:30, perante a estatua de Amador e Daniel, os dous operarios da Bazán asasinados pola policía española en 1972.