A Asociación de Migrantes de Ferrolterra (ASMIREFE) e os compañeiros da CIG homenaxean Marga Bellas

O pasado 6 de maio celebrouse en Ferrol a homenaxe á compañeira sindicalista Marga Bellas. No acto, organizado pola Asociación de Migrantes de Ferrolterra (ASMIREFE), da que ela foi fundadora, lembrouse o seu activo papel a prol da integración das mulleres e homes migrantes na comarca, alén do seu compromiso como sindicalista da Confederación Intersindical Galega.

A Galería Sargadelos apenas deu para acoller a todos os homes e mulleres, inmigrantes, emigrantes e sindicalistas, ademais de amigos e amigas, que coa súa presenza quixeron homenaxear a Marga Bellas, que foi Presidenta de Honra e Fundadora da Asociación de Migrantes de Ferrolterra (ASMIREFE), ademais de sindicalista da CIG. Un recoñecemento polo seu labor a prol da inserción sociocultural, lingüística e laboral, que Mabel Charquero, Presidenta de ASMIREFE, resumiu afirmando que "ela foi quen fixo posíbel a nosa estadía e integración en Galiza".

Ás súas palabras sumáronse outras achegas cheas de sentimentos e lembranzas como as do compañeiro Juanjo (Uruguai), da compañeira Katy (Chile), ou de Isabel Gómez, quen fixo un emotivo relatorio lembrando o seu compromiso cun outro mundo que si é posíbel.

As palabras foron un continuo repaso da singradura desta muller, como feminista, nacionalista, e loitadora polos dereitos das persoas inmigrantes e emigrantes, cuestión que foi valorada polo coordinador e Voceiro do Foro de Inmigración e da Asemblea Galega de Inmigración, Miguel Blanco. Tamén cabe salientar a achega do poeta galeguaio Devesa Monterroso, quen deu lectura a uns textos de Viglietti, Galeano e outros. Pola parte da CIG a asistencia de cadros sindicais tamén foi significativa, e tras a lectura duns escritos de Laura Bugallo, sindicalista e amiga persoal da homenaxeada, foi o Secretario Comarcal da CIG-Ferrol, Xesús Anxo López Pintos, quen puxo de manifesto o arduo traballo de Marga Bellas como sindicalista no Concello de Ferrol.

Pintos salientou, ademais, o traballo por ela desenvolvido e cuxo froito son os resultados electoriais na Corporación local ferrolá e reiterou o compromiso da CIG para os dereitos das persoas traballadoras, sen distingos de orixe. Todo o acto contou co son do compañeiro, concelleiro do BNG en Ares e gaiteiro Manuel Doval, comezando cunha peza tradicional e rematando a Homenaxe co Himno da Patria Galega.