CIG-Servizos mobilízase en solidariedade con 12 vixilantes despedidos en Lugo

O pasado 31 de Marzo foron despedidos 12 vixilantes, traballadores da empresa GARDA Servicios de Seguridad S.A. que prestaba servizos de seguridade privada para Compass Transworld Logistics S.A./Megacontainer S.L. e outras compañías que constitúen unha unión temporal de empresas que teñen os almacéns dos parques eólicos en Rábade, Outeiro de Rei e O Corgo, os tres con servizos de vixilancia 24 horas diarias.

Os 12 vixilantes foron substituídos por outros tantos controladores, auxiliares de servizos, da empresa DIVERSERVICIOS 2000 S.L. (UMANOS SERVICIOS INTEGRALES S.L.), que prestan as mesmas funcións que viñan desempeñando os traballadores despedidos: vixilantes de seguridade, control de accesos, rexistro e identificación de persoas e vehículos que acceden aos centros de traballo, custodia de chaves e protección dos materiais, bens e inmobles, etc. Unha situación totalmente ilegal que incumpre claramente a Lei de Seguridade Privada.

A CIG-Servizos e 11 dos traballadores despedidos presentaron denuncias diante da unidade encargada da seguridade privada da policía española e na Inspección de Traballo. Ambos organismos constataron o intrusismo laboral, infraccións graves e, por ilo, vanse propoñer sancións para as empresas DIVERSERVICIOS 2000 S.L. (UMANOS SERVICIOS INTEGRALES) e COMPASS TRANSWORLD LOGISTICS S. A. / MEGACONTAINER S.L.

Por outro lado, a CIG-Servizos vai demostrar diante do Xulgado do Social, se non se produce a readmisión dos traballadores no S.M.A.C., que as empresas denunciadas seguen a prestar un servizo de seguridade e, polo tanto, aos 12 traballadores despedidos se lles debe de recoñecer o dereito de subrogación que lles recoñece o seu convenio colectivo.

A CIG-Servizos realizou o 7 de maio unha concentración diante da Subdelegación do Goberno español, á que se uniron outras centrais, en contra do intrusismo laboral no sector da seguridade privada. A protesta non foi contra os traballadores das empresas de servizos (controladores) que carecen de convenio colectivo e polo tanto cobran salario mínimo interprofesional, pero si contra estas compañías, que se lucran dunha actividade ilegal e que, na maioría dos casos, pertencen aos empresarios propietarios das Empresas de Seguridade (SECURITAS-Servisecuritas, CETSSA-Gespocont, ESABE-Auxiliares, EULEN-Eulen Servicios S.A).

“Polo tanto son os propios empresarios da Seguridade Privada os que están dinamitando o sector, mermando postos de traballo e recortando dereitos laborais e salariais aos traballadores”, manifesta Xosé Paz, secretario comarcal da CIG-Servizos de Lugo.