Unha empresa de confección de Ordes mantén as operarias sen carga de traballo

A empresa, ademais, advírtelles ás traballadoras que non hai “ningún tipo de garantía” de que vaian cobrar o salario de outubro, nin de que poida afrontar o pagamento das indemnizacións correspondentes.

Industrias Orde S.A. tamén lle adebeda ás traballadoras, 17 en total, a paga extraordinaria de xullo e as diferenzas de salario do IPC real desde o 1 de xaneiro de 2007.

O último Expediente de Regulación de Emprego temporal produciuse no período comprendido entre o 8 de agosto e o 30 de setembro deste ano. As operarias, ao reincorpóranse aos seus postos o 1 de outubro, atopáronse con que os patróns as manteñen sen carga de traballo durante as oito horas de xornada laboral. Pola súa banda, a única “solución” que lles aportan ás mulleres é recomendarlles que abandonen o seu posto na procura de traballo noutra empresa, de tal xeito que Industrias Orde S.A. aforraría os cartos dos despedimentos. De momento, as empregadas non teñen constancia de que a compañía vaia presentar un novo ERE.

Ante esta situación completamente insostíbel na empresa, derivada da incompetencia dos seus propietarios, a FGAMT-CIG vén de interpor unha demanda contra Industrias Orde S.A. no Servizo de Mediación, Arbitraxe e Conciliación (SMAC) da Coruña. No escrito, a central nacionalista esixe a extinción do contrato que une as traballadoras coa empresa e que sexan indemnizadas con 45 días de salario por ano de servizo, como se dun despedimento improcedente se tratase.