Cerámicas Dominguez do Noroeste (Cedonosa), unha fábrica de gres situada en Catoira, presentou o pasado mes de abril no Xulgado do Mercantil unha demanda de suspensión de pagos. Un proceso de especulación apoiado por fundos públicos, coa creación doutra planta idéntica en Teruel, mantén na incerteza a 87 familias. O 1 de maio Catoira botouse ás rúas para exixir futuro para esta planta e que se manteñan todos os empregos.

O luns 29 de abril no local comarcal da CIG de Vigo tivo lugar a rolda de prensa de presentación deste 1 de maio en Vigo, onde se celebrará a manifestación central da CIG, e na que participará o secretario xeral da central sindical, Suso Seixo. Esta mobilización partirá ás 12 do cruce da Doblada e rematará na Porta do Sol.

A CIG de A Mariña realizou o 23 de abril en Ribadeo unha asemblea preparatoria do 1º de Maio, á que asistiron 50 delegados. A manifestación partirá ás 12:30 horas desde a Avenida Arcadio Pardiñas en Burela, fronte ao local da CIG.