A Asemblea de traballadores de Albada, empresa que xestiona a planta de tratamento de residuos de A Coruña, ratificou o 30 de xuño, por inmensa maioría, o acordo acerca do convenio colectivo que alcanzaran tres días antes o comité e representantes da empresa.

MARTINSA-FADESA anuncioulles aos representantes sindicais e membros do comité de empresa en A Coruña que despedirá 60 traballadores na cidade, a mesma cifra que pactara semanas atrás coa Consellaría de Traballo. CCOO, sindicato maioritario no comité, consinte este plan, do mesmo xeito que a pretensión da empresa de trasladar a Madrid a mesa de negociación sen que nesta teñan un papel propio os representantes do cadro de persoal de A Coruña.

O comité de empresa provincial da Cruz Vermella de A Coruña reitera as súas denuncias pola paralización da negociación do convenio colectivo. A dirección da ONG segue sen presentarlle á parte social unha nova proposta salarial e, aínda por riba, despediu unha empregada hai días alegando que “non hai cartos para manter o emprego”.

A CIG conseguiu os catro representantes que estaban en liza nas eleccións sindicais celebradas entre os traballadores da UTE-Langosteira para a ampliación do comité de empresa. A estes novos delegados hai que sumarlle os outros catro que ten o sindicato nacionalista no órgano de representación dos obreiros contratados pola Unión Temporal de Empresas encargada da construción do porto exterior coruñés.

Cidadáns de A Coruña e da comarca secundaron a manifestación que o pasado 21 de xuño percorreu varias rúas céntricas da cidade en demanda da rexeneración da Ría do Burgo. A “Plataforma para a Defensa da Ría do Burgo”, entidade organizadora da marcha, convoca unha nova manifestación para o 20 de setembro.

A CIG e a sección sindical do sindicato na Autoridade Portuaria de A Coruña dubidan da legalidade da modificación dos usos dos terreos do Peirao de Batería, que hai dous días aprobou inicialmente o Consello de Administración do ente portuario, para a súa desafectación posterior a falta da autorización final do Ministerio de Fomento.