Cedonosa atópase no concurso de acredores ordinario que se está a levar no Xulgado do Mercantil nº1 de Pontevedra. Dentro deste procedemento a empresa solicitou a extinción de 26 contratos e a conversión de 11 en fixos descontinuos. Por parte do Xulgado instouse as partes a que tal e como establece a lei concursal se iniciara o período de consultas para negociar de boa fe un acordo do ERE.

O xoves 22 de maio os traballadores e traballadoras de Cedonosa concentrábanse ás portas da fábrica para protestar pola subministración eléctrico e reclamar que, coa volta da luz, a factoría puidese volver a traballar. Ían manter as concentracións todos os días, mais esa mesma tarde Fenosa conectou esta instalación de novo á rede eléctrica.

Desde as doce da mañá o conxunto do persoal de Cedonosa concentrábase diante das dependencias desta factoría para reclamar a necesaria recuperación da luz para que poda retomarse a actividade produtiva desta fábrica. Esta manifestación repetirase todos os dias até que volva o subministro eléctrico a Cedonosa.

Nos últimos días por parte do Comité de empresa e das centrais sindicais (CIG, CCOO e UGT) mantivéronse diversas reunións coas Administracións (Consellería de Industria, Consellería de Traballo e IGAPE, así como coa comisión de seguimento do Concello de Catoira), pero tamén coa Dirección da Empresa, a última foi o 20 de maio.

O xoves 8 de maio celebrouse unha xuntanza do Comité de Empresa, representantes das centrais sindicais CIG, CCOO e UGT e os representantes da empresa Cedonosa, Fernando Herce, como presidente da compañía, Juan Carlos Lumbreras como Director Xeral e Luís Martín como asesor e redactor do plan de viabilidade.