Cunha alta participación de delegados e delegadas, así como de cadros sindicais, uns e outros da federación de administración pública da CIG, o pasado venres 21 de novembro tivo lugar en Montouto (Teo) a celebración dun encontro de normalización lingüística, en resposta á convocatoria conxunta feita pola dirección de CIG-Administración e polo Departamento de Normalización Lingüística da central sindical.

“Por unha administración mellor, mellor en galego” é o lema da campaña de promoción do uso do galego que a CIG vén de pór en marcha na Administración Pública. A campaña, que constitúe a segunda fase dunha iniciativa que arrancou antes da celebración do 17 de Maio, pretende concienciar á traballadores/as e administracións da necesidade de afondar no cumprimento da normativa referida á normalización lingüística.

A sección de Institucións Penitenciarias da CIG-Administración vén de denunciar o incumprimento do acordo asinado o 29 de marzo de 2005 entre o Ministerio do Interior, concretamente a Secretaría Xeral de Institucións Penitenciarias, e varias organizacións sindicais representativas do sector, entre as que se atopa a CIG. O acordo recolle melloras das condicións de traballo, incremento da produtividade e optimización do funcionamento da Administración Penitenciaria.

Un cento de delegados/as da Área Pública da CIG, que engloba as federacións de Administración Pública, Ensino e Saúde, concentráronse o 5 de novembro diante da Delegación do Goberno español na Coruña para rexeitar o último acordo retributivo atinxido na Mesa Xeral de Negociación das Administracións Públicas.

As tres Federacións da Área Pública da CIG, Administración Pública, Ensino e Saúde, convocaron unha concentración de delegados/as diante da delegación do Goberno, na Coruña, o 5 de novembro para rexeitar o acordo retributivo para as/os empregadas/os públicos da Mesa Xeral de Madrid para o vindeiro ano. Ademais, entregarase unha carta dirixida a ministra de Administracións Públicas na que se recollen as reivindicacións da central.

A CIG denuncia a precariedade dos medios cos que conta en Galiza o Servizo de Vixilancia Aduaneira. En tres das seis bases marítimas do país, as embarcacións sobrepasan os 24 anos de antigüidade e o helicóptero da zona norte tan só dispón de dúas horas de autonomía.