Os traballadores de Telefónica realizarán un paro de 3,5 horas cada un dos días que estea previsto que se reúna a mesa de negociación do Convenio Colectivo de empresa, e que comezou na xornada do día 29, con paros e mobilizacións, como a concentración que tivo lugar na cidade de Vigo.

A patronal da Sanidade Privada-Concertada séguese a negar a negociar o convenio colectivo e a mellorar as condicións laborais das traballadoras e traballadores do sector. Por iso na mañá deste xoves 22 de maio celebrouse unha nova concentración diante do Policlínico da Rosaleda, en Compostela, para denunciar a situación nas que se atopan e reclamar unha inmediata solución.

Os delegados da CIG e UGT da sanidade privada veñen de acordar un calendario de concentracións en todos os hospitais da provincia da Coruña durante o mes de maio. As mobilizacións culminarán coa convocatoria dunha folga xeral de 24 horas os mércores 4 e 11 de xuño se antes non se consegue culminar a negociación do convenio.

O comité de empresa provincial da Cruz Vermella de A Coruña iniciará unha campaña de recollida de sinaturas entre a cidadanía para apoiar as súas reivindicacións. Pola súa banda, a dirección desta ONG segue a amosar unha vontade escasa para negociar o convenio colectivo. Mentres, a precariedade salarial do cadro de persoal continua.

A ruptura por parte da patronal das negociacións do convenio colectivo provincial da sanidade privada de A Coruña obrigou os traballadores a retomar as mobilizacións. O 24 de abril, despois de concentrárense diante do Hospital San Rafael, pecháronse por espazo dunha hora e media nas instalacións deste centro médico coruñés.

O comité de Albada cualifica como positiva a reunión desta mañá coa empresa, a primeira mantida entre as partes desde o 11 de abril, data na que os traballadores referendaron o acordo atinxido entre os seus representantes e a empresa acerca da negociación do convenio colectivo.