Os traballadores/as do sector de produtos elaborados do mar, que en Galiza emprega aproximadamente 2.500 persoas, perciben 700 euros netos ao mes polo desempeño dunha actividade dura que require de grande esforzo físico. A CIG sopesa convocar unha folga no sector de non mellorar as condicións retributivas e laborais na negociación do convenio.

A Asemblea de traballadores de Albada, empresa que xestiona a planta de tratamento de residuos de A Coruña, ratificou o 30 de xuño, por inmensa maioría, o acordo acerca do convenio colectivo que alcanzaran tres días antes o comité e representantes da empresa.

O comité de empresa provincial da Cruz Vermella de A Coruña reitera as súas denuncias pola paralización da negociación do convenio colectivo. A dirección da ONG segue sen presentarlle á parte social unha nova proposta salarial e, aínda por riba, despediu unha empregada hai días alegando que “non hai cartos para manter o emprego”.

Representantes dos traballadores e Albada seguen sen chegar a un acordo acerca da negociación do convenio colectivo. A empresa, o 10 de xuño, puxo enriba da mesa unha proposta que está por debaixo do pactado no preacordo atinxido entre as partes o pasado 11 de abril e que supuxo a desconvocatoria da folga.

O comité de empresa provincial da Cruz Vermella de A Coruña rexistrou, o 6 de xuño no Edificio Administrativo da Xunta na cidade, as dúas mil sinaturas de apoio que recolleu nas últimas semanas e que solicitan a dignificación dos salarios dos traballadores da institución.

Os traballadores e traballadoras da sanidade privada – concertada da provincia de A Coruña secundaron maioritariamente o 4 de xuño a primeira das xornadas de folga no sector. A cifra de seguimento do paro atinxiu o 85 %. Mentres, a CIG e os empregados denuncian que os servizos mínimos marcados pola Administración foron abusivos.