Á homenaxe, realizada a media mañá, asistiron pouco máis de medio cento de veciños e personalidades, en representación de organizacións políticas, sociais e culturais, así como algúns cargos institucionais. Unha cifra importante tendo en conta a hora e o afastado do lugar.

Ao principio do acto cantouse o Himno Galego, ao son da gaita, e despois un concelleiro do BNG do municipio dixo unhas palabras moi axeitadas relativas á figura de Elixio Rodríguez (finado no ano 2007). Non esquecendo a súa rexa actitude en defensa da nosa identidade e na loita contra a ditadura. Lembrou ademais que moitos mozos do lugar, como el, viron neste galeguista exiliado un exemplo que seguir.

A continuación inaugurouse unha praza co nome de Elixio Rodríguez, así como unha placa conmemorativa que foi descuberta pola súa compañeira Gloria. Unha vez rematada a inauguración a maioría dos presentes desprazáronse ao multiusos de Lobios onde se ía facer a presentación da edición do libro biográfico “Matádeo mañá”.