Nunha rolda de prensa, celebrada o venres 31 de outubro no local sindical da CIG de Vigo, deuse a coñecer a convocatoria de folga para todos aqueles traballadores aos que se lles aplique o convenio provincial do Metal de Pontevedra. Estes máis de 22.000 traballadores están chamados á folga contra a represión sindical, xa que nesa data van ser xulgados catro traballadores do Metal, que no 2007 estiveron case quince días en folga para que se cumprira o convenio. A Fiscalía solicita catro anos de cárcere para estes catro folguistas. Ademais con esta folga, a CIG tamén quere denunciar a situación de precariedade que continúa a existir no sector.

Como "un grande éxito" cualificaba Paulo Rubido, secretario nacional da federación de Servizos da CIG, a primeira xornada de folga do Comercio vario da provincia da Coruña. Tal é así que nas cidades de Ferrol, A Coruña e Compostela pecharon entre o 90 e o 95% dos estabecelementos comerciais. Algúns iniciaron a xornada xa pechados. Outros, íanse sumando ao paso dos piquetes, que en Ferrol chegaron a ser de máis de 300 persoas, en Compostela rondar as 500 e na Coruña superar amplamente as 1000.

Comeza a folga do comercio vario da provincia da Coruña en demanda de que se negocie un novo convenio colectivo, logo de que a patronal ignorase o chamamento ao diálogo das traballadoras e traballadores e as centrais sindicais. As negociación estaban paralizadas desde o mes de xuño ao negarse a parte empresarial a aceptar máis que un incremento salarial do IPC previsto e sen incluír, sequera, a cláusula de revisión salarial.

Con concentracións diante do Parlamento de Galiza -onde tramitaron unha solicitude de entrevista con todos os grupos con representación na cámara galega-, unha marcha até San Caetano polas rúas da zona vella compostelá e unha concentración diante de Presidencia, reiteraron, na mañá deste xoves 16 de outubro, a súa exixencia de melloras nas condicións laborais e o recoñecemento do dereito á subrogación, as traballadoras e traballadores do servizo de atención a emerxencias 112.

O pasado mes de xuño CIG-Correos poñía en marcha unha campaña de mobilizacións en demanda do reforzamento do cadro de persoal desta entidade no concello de Ames. Un reforzamento imprescindíbel para garantir o reparto postal diario, non só na zona rural do concello, senón mesmo nas urbanas de Bertamiráns e o Milladoiro, onde non supera as dúas veces por semana.

Desde a CIG de Valdeorras veñen de alertar da intención de varias empresas do sector da lousa como IPISA, FERLOSA, CUPIGA, PEBOSA ou IPIGA de xustificar os atrasos que se están a producir no pagamento das nóminas ás traballadoras e traballadores alegando problemas relacionados coa crise económica.