O luns 10 de novembro tivo lugar a rolda de prensa de presentación da mobilización convocada pola CIG para o próximo 13 de novembro "Por un novo modelo económico e social" e para que "A crise a pague o capital", na comarca de Vigo. Asi, informouse de que esta será a manifestación central da organización sindical nacionalista, que contará coa presenza do secretario xeral da CIG, Suso Seixo. Esta marcha sairá ás oito da tarde de Vía Norte e rematará o seu percorrido na Porta do Sol.

A manifestación da CIG da Coruña do 13 de novembro partirá ás 20:00 horas desde a Praza da Palloza. A cita foi presentada ante os medios de comunicación locais por Paulo Carril, secretario comarcal da central nacionalista, que os informou das consecuencias da crise no emprego da bisbarra.

Pasadas as oito e media da tarde comezaba a marcha en defensa do emprego na automoción, convocada pola CIG. Traballadores e traballadoras de empresas do téxtil, do transporte, do metal e de químicas afectados pola crise no sector da automoción estiveron presentes nesta mobilización, para demandar medidas globais para facer fronte ao actual contexto de crise no automóbil, e non actuacións individuais e negativas para a clase traballadora como os expedientes de regulación de emprego.

Acompañados de perto de cincuenta delegados, delegadas, presidentes e secretarios dos Comités de Empresa das Federacións do Metal, Químicas e do Téxtil e Transporte, tivo lugar o mércores 29 de outubro a rolda de prensa de presentación da manifestación que a CIG convocou para o próximo 3 de novembro na cidade de Vigo, e que sairá ás oito da tarde de Vía Norte. Baixo o lema “En defensa do emprego na automoción”, a CIG pretende denunciar a situación que está a vivir o sector, así como chamar á atención das Administracións neste contexto, porque “non poden pagar de novo os traballadores e traballadoras esta crise”.

Do 14 ao 21 de outubro, a cidade de Vigo acollerá o VII Encontro Internacional da Marcha Mundial das Mulleres, que xirará en torno á Soberanía Alimentaria e no que participarán delegados e delegadas procedentes dos cinco continentes. A CIG, a través da Secretaría da Muller, vén de manifestar o seu apoio e colaboración con este evento e fai un chamamento a participar na manifestación que terá lugar o 19 de outubro ás 12:00 hora en Vigo baixo o lema “Cambiar a vida das mulleres para cambiar o mundo, cambiar o mundo para cambiar a vida das mulleres”

O venres 12 de setembro os traballadores e traballadoras de Cedonosa de Catoira volvían saír as rúas para berrar contra os despedimentos e coa situación que veñen arrastrando desde abril, mes desde o que o persoal se reduciu un 32%. Desde este momento paralizouse un forno e Cedonosa deixou de producir 150.000 metros cuadrados de gres entre as factorías de Teruel e Catoira.