O comité de empresa de Rieter Saifa Noroeste SL, e os sindicatos CIG e CC.OO. acordaron o luns 27 de outubro convocar unha folga indefinida a partir do martes 4 de novembro. Este conflito laboral afecta a un total de 160 empregados e empregadas, que traballan nesta empresa téxtil do sector do automóbil de A Rúa. Esta medida de presión adoptouse en base á decisión tomada na asemblea de traballadores do sábado 25 de outubro, que decidiu chamar á folga para reclamar melloras na negociación colectiva da súa situación laboral.

A folga no Comercio vario da provincia da Coruña, programada para o 17 de outubro, foi convocada legalmente polos sindicatos CIG, UGT e CCOO sete días antes da data fixada coa entrega dun escrito na Subdelegación do Goberno español na cidade herculina.

A CIG Metal de Vigo vén de editar e distribuir material informativo para dar a coñecer ao conxunto dos traballadores do naval de Vigo cuestións como o debate sobre o convenio colectivo que se iniciou na asemblea de delegados deste sector, ou a situación de incumprimento do convenio que se está a dar polo alto número de traballadores estranxeiros, aos que non se lles está a pagar segundo o convenio. Tamén se da a coñecer a proposta da CIG para que o 6 de novembro se realice un paro no naval, xa que ese día terá lugar o primeiro xuízo contra catro traballadores do naval, e a CIG propón ao resto de centrais sindicais realizar unha concentración diante dos Xulgados, en solidariedade con estes compañeiros porque "teñen que saber que un castigo a estes compañeiros é unha sentenza contra todo o metal, e non podemos toleralo".

Traballadoras e traballadores do sector de comercio vario da provincia da Coruña concentráronse diante das delegacións da Confederación de Empresarios da Coruña e Compostela e do centro comercial Odeón en Ferrol en demanda de que se retomen as negociacións do novo convenio colectivo. O próximo 17 de outubro o sector xa anunciou que irá á folga se a patronal continúa bloqueando o acordo.

Os traballadores de Telefónica realizarán un paro de 3,5 horas cada un dos días que estea previsto que se reúna a mesa de negociación do Convenio Colectivo de empresa, e que comezou na xornada do día 29, con paros e mobilizacións, como a concentración que tivo lugar na cidade de Vigo.

A patronal da Sanidade Privada-Concertada séguese a negar a negociar o convenio colectivo e a mellorar as condicións laborais das traballadoras e traballadores do sector. Por iso na mañá deste xoves 22 de maio celebrouse unha nova concentración diante do Policlínico da Rosaleda, en Compostela, para denunciar a situación nas que se atopan e reclamar unha inmediata solución.