O mes de xullo caracterízase polo importante volume de contratacións no SERGAS para substituír ás traballadoras e traballadores que marchan de vacacións. A CIG-Saúde tiña denunciado que, neste ano, esas contratacións estaban a realizarse de forma irregular. Legalmente esas contratacións deben realizarse seguindo unhas listaxes pero as da convocatoria celebrada en setembro de 2007 aínda non foron publicadas. O SERGAS, na mesa sectorial celebrada este mércores 10 de xullo, comprometeuse a facer públicas as listas nun prazo de 10 días.

CIG-Saúde felicita o Consello da Xunta por aprobar o cambio na denominación do “Complexo Hospitalario Universitario Juan Canalejo”, que pasará a chamarse “Complexo Hospitalario Universitario de A Coruña”. Esta medida representa un exercicio de hixiene democrática, de xustiza histórica e de desagravio ás vítimas da barbarie franquista.

As persoas integrantes da sección sindical de Povisa deron unha rolda de prensa o venres 4 de xullo no local sindical da CIG de Vigo para amosar a súa preocupación diante das informacións que están a aparecer nos medios sobre o novo hospital, xa que a estabilidade dos seus empregos está en xogo, polo que demandan abrir unha vía de diálogo con Sanidade.

Medio cento de técnicos superiores e de técnicos en coidados auxiliares de enfermaría do SERGAS mobilizouse o 23 de xuño no Hospital Arquitecto Marcide en demanda dunha reclasificación xusta dos seus postos. Os e as traballadoras trasladaron as súas protestas nunha marcha desde o despacho de Recursos Económicos até o de Recursos Humanos. CIG-Saúde convocou ese día concentracións simultáneas en todos os hospitais públicos do país.

Os traballadores e traballadoras da sanidade privada – concertada da provincia de A Coruña secundaron maioritariamente o 4 de xuño a primeira das xornadas de folga no sector. A cifra de seguimento do paro atinxiu o 85 %. Mentres, a CIG e os empregados denuncian que os servizos mínimos marcados pola Administración foron abusivos.

A patronal da Sanidade Privada-Concertada séguese a negar a negociar o convenio colectivo e a mellorar as condicións laborais das traballadoras e traballadores do sector. Por iso na mañá deste xoves 22 de maio celebrouse unha nova concentración diante do Policlínico da Rosaleda, en Compostela, para denunciar a situación nas que se atopan e reclamar unha inmediata solución.