O sábado 29 de novembro tivo lugar o II Congreso da FGAMT, que se desenvolveu durante toda a xornada no Hotel Coia da cidade de Vigo, cun acordo case que unánime en todas as votacións e debates. Xosé Fernández Piñeiro foi re-elexido secretario nacional desta federación, contando co voto a favor da súa candidatura de 137 congresistas e tan só dunha abstención. A crise económica e as propostas da CIG para enfrontar esta situación estiveron moi presentes neste encontro, no que participou Suso Seixo, secretario xeral da CIG, na súa clausura.

Logo de 12 días de paro indefinido, a folga do convenio provincial de limpeza de edificios e locais de Pontevedra quedou desconvocada. Centrais sindicais e patronal chegaron a un pre-acordo que foi ratificado polas asembleas de traballadores. A proposta aceptada contempla a sinatura dun convenio colectivo para os vindeiros tres anos e inclúe un incremento salarial de 30 euros o primeiro ano e 40 euros para cada un dos outros dous. Ademais, estabelécese unha cuarta paga de 60 euros. A antigüidade pasa a computarse por cuadrienios, no canto de trienios.

As centrais sindicais CIG, ACAIP, APFT, ATP, CCOO, CSIF, UGT e USO convocaron unha concentración diante do Centro de Inserción Social de Vigo (CIS), na Avenida de Madrid 106 o 26 de novembro ás 10.30. Con esta mobilización queren denunciar publicamente a situación precaria, discriminatoria e marxinal do Centro de Inserción Social penitenciaria de Vigo, ao non contemplar cadro de persoal de traballadores e traballadoras, como xa teñen previsto para os CIS do resto do Estado.

As tres centrais sindicais convocantes da folga indefinida na limpeza de edificios e locais da provincia de Pontevedra extenderon o 24 de novembro o conflito a todas aquelas persoas que traballen no sector da limpeza, xa que entregaron no rexistro unha nova convocatoria de folga, desta volta para todo o sector da limpeza o vindeiro 3 de decembro, mesmo para aquelas que teñen convenio propio, polo que o paro afectaría aos catro hospitais da provincia e tamén aos centros educativos públicos de toda Pontevedra, asi como todos os edificios das distintas administracións.

Marchas polo centro de Vigo, sinalando a aquelas empresas que continúan a vulnerar o dereito de folga, visitas dos grupos de piquetes a áreas comerciais e outras accións, foron o centro das mobilizacións do sexto dia de folga na loita por un convenio xusto da limpeza de edificios e locais da provincia de Pontevedra. Fóra da cidade olívica, o grupo de piquetes de Pontevedra continuaba extendendo o conflito cara outras zonas da comarca, como o concello de Sanxenxo ou o porto de Marín, ademais do mantemento do paro na zona do Salnés.

Cuarta xornada de folga indefinida no sector da limpeza, que levou ás piquetes a realizar novas accións como a ocupación da sede da Cámara de Comercio en Pontevedra, ou a unha manifestación ao longo de toda a mañá en Vigo de perto de 400 traballadoras/es do sector polo centro da cidade. Na tarde do 20 de novembro había convocada unha reunión con Pilar Cancela, directora xeral de Relacións Laborais, mais a patronal non compareceu ao asegurar que non negocia con "vándalos".