Este venres 10 de outubro celebráronse asembleas para dar a coñecer as novidades no conflito polo convenio provincial de limpeza de edificios e locais da provincia de Pontevedra. Diante das mudanzas existentes, xa que o luns terá lugar unha xuntanza entre patronal e sindicatos, aprobouse adiar a convocatoria de folga até o próximo dia 20 de outubro, para coñecer cal é a nova oferta que quere realizar a patronal.

A folga no Comercio vario da provincia da Coruña, programada para o 17 de outubro, foi convocada legalmente polos sindicatos CIG, UGT e CCOO sete días antes da data fixada coa entrega dun escrito na Subdelegación do Goberno español na cidade herculina.

A planta de “Pull and Bear Logística” de Narón permaneceu sen actividade na folga de 24 horas que se desenvolveu o 7 de outubro. Esta medida de presión foi acordada polo comité de empresa (CCOO e CIG) logo de que esta firma do grupo Inditex despedise tres operarios, dous deles de baixa laboral.

CIG, CCOO e UGT convocaron folga indefinida na limpeza de edificios e locais da provincia de Pontevedra a partir do 13 de outubro. Despois do preacordo asinado pola patronal, esta impugnou o acordo económico, ditado no Laudo arbitral do mes de xullo, xa publicado no Boletín Oficial da Provincia. Agora as centrais sindicais sinalan que "os traballadores e traballadoras non somos responsábeis desta folga, senón que a responsábel é a patronal por non cumprir o preacordo".

No mes de marzo deste ano comezaba a negociación do convenio colectivo de limpeza de edificios e locais da provincia de Ourense, que afecta a máis de 2.000 traballadoras e traballadores. Despois de sete reunións, a última a principios de xuño, non se chegou a ningún acordo nin houbo avanzos significativos. Ante esta situación as traballadoras e traballadores deste sector decidiron convocar folga indefinida no sector desde o 1 de outubro.

Máis de 8.000 traballadoras e traballadores do servizo de limpeza de edificios e locais da provincia de Pontevedra, entre estes os hospitais privados, ambulatorios ou Citroën, están convocadas a unha folga con carácter indefinido para a primeira quincena de outubro, pola impugnación que a patronal realizou do laudo arbitral emitido pola AGA do acordo ao que chegaran as dúas partes o pasado mes de maio, para evitar daquelas a convocatoria de folga prevista.