Os catro traballadores despedidos do taller de xoiería Cerqueiro concentráronse, este mércores 24 de setembro, diante da tenda que o empresario ten na Praza de Galiza de Compostela, apoiados pola CIG. Demandan a readmisión e o pagamento dos salarios que se lles adebedan.

Máis de 300 profesores e profesoras, convocados pola CIG-Ensino, concentráronse este mércores 17 de setembro, fronte á Consellaría de Educación en contra dos despedimentos dos interinos e interinas e do recorte de prazas nos centros. Para a CIG-Ensino “ é inadmisíbel que esteamos asistindo a un inicio de curso no que a Consellaría de Educación está reducindo os cadros de persoal dos centros de ensino e condenando ao paro a máis de 135 interinos/as que traballaron durante todo o curso pasado”.

Traballadores e traballadoras de Serrabal e Ferroatlántica participaron este xoves 24 de xullo nunha concentración convocada para demandar os informes técnicos encargados polo ADIF nos que se avalía o impacto tanto ambiental como económico do trazado do AVE ao seu paso pola mina de Serrabal, e a súa entrega inmediata tanto aos Comités de Empresa como ao Parlamento de Galiza. Unha vez máis reiteraron a súa exixencia de cambio de trazado.

Medio cento de técnicos superiores e de técnicos en coidados auxiliares de enfermaría do SERGAS mobilizouse o 23 de xuño no Hospital Arquitecto Marcide en demanda dunha reclasificación xusta dos seus postos. Os e as traballadoras trasladaron as súas protestas nunha marcha desde o despacho de Recursos Económicos até o de Recursos Humanos. CIG-Saúde convocou ese día concentracións simultáneas en todos os hospitais públicos do país.

As seis da tarde delegados e traballadores do metal da CIG de Ourense concentrábanse diante da Confederación de Empresarios de Ourense, onde tiña lugar unha nova xuntanza da Comisión Negociadora do Convenio Provincial do Metal de Ourense. Grazas á presión da CIG, a patronal retirou en boa medida a proposta de traballar os sábados.

O 15 de maio tivo lugar a primeira das mobilizacións que se desenvolverán en contra do despedimento dun traballador de Faurecia Interior Systems, afiliado da CIG, que levaba 12 anos en Faurecia e era fixo desde o 2002, vítima da represión sindical da empresa, xa que foi unha das persoas máis activas na negociación colectiva do convenio de Faurecia e é membro da sección sindical da CIG na empresa.