A CIG vén de anunciar a posta en marcha dunha campaña dirixida a explicar as causas da actual crise económica e en demanda da aplicación de medidas que garantan as condicións de vida da clase traballadora, que favorezan realmente aos sectores produtivos e que posibilten maior autogoberno para Galiza. Unha campaña que se quere facer chegar a todas as organizacións do nacionalismo para poder dar unha resposta común ante unha crise que vai afectar á maioría da poboación.

  A CIG remitiu aos medios de comunicación unha nota na que exixe que o Parlamento de Galiza aclare quen tomou e por que, a decisión de impedir aos representantes da central, promotores da Iniciativa Lexislativa Popular, facer declaracións nin sequera ás portas do edificio do Parlamento de Galiza.

O portavoz do grupo parlamentar do BNG, Carlos Aymerich, remitiu un escrito á presidenta da Cámara en protesta polos feitos acontecidos na mañá do martes 17 de xuño no Parlamento, nos que os representantes da CIG foron expulsados cando ían atender aos medios de comunicación despois de presentar unha iniciativa lexislativa popular.

Representantes da CIG fixeron entrega, este martes día 17 de xuño, das máis de 19.000 sinaturas, xa certificadas pola oficina do censo electoral, para promover unha ILP e obrigar á institución parlamentaria a retomar o debate sobre o chamado plus de altos cargos. Porén, non se puido explicar aos medios o contido da mesma porque o xefe de seguridade do Parlamento impediuno, aducindo que tiña ordes de prohibir que se fixeran declaracións, nin sequera na porta de entrada do edificio.

A Secretaría da Muller da CIG únese ás críticas contra a reforma da directiva de Tempo de Traballo, aprobada a semana pasada polos ministros de Emprego da UE, que pretende ampliar a 65 horas o número máximo de horas que comprenden a xornada laboral. A medida, para a súa entrada en vigor, aínda ten que ser debatida e aprobada no Parlamento europeo.

Os empregados de Telefónica secundaron novamente o 12 de xuño paros de tres horas e media en cada unha das quendas de traballo para denunciar a intención da empresa de modificar as condicións salariais do cadro de persoal.