Un obreiro da UTE-Langosteira resultou ferido nun accidente ocorrido nas obras do porto exterior contra as 23:00 horas do 31 de xullo. O operario, condutor de camión, caeu cara atrás tras recibir unha descarga eléctrica cando, por orde do encargado, estaba a limpar cunha mangueira o seu vehículo, que estaba situado xusto enriba dun cadro eléctrico.

A comezos de semana saltaba a todos os medios nacionais, estatais e mesmo internacionais a noticia de que MARTINSA-FADESA solicitaba un concurso voluntario de acredores, proceso antes coñecido como suspensión de pagamentos. Paulo Carril, secretario comarcal da CIG e asesor da central no conflito, amosa nesta entrevista o punto de vista do sindicato nacionalista a respecto desta crise, paradigma claro da economía especulativa.

CIG-Saúde felicita o Consello da Xunta por aprobar o cambio na denominación do “Complexo Hospitalario Universitario Juan Canalejo”, que pasará a chamarse “Complexo Hospitalario Universitario de A Coruña”. Esta medida representa un exercicio de hixiene democrática, de xustiza histórica e de desagravio ás vítimas da barbarie franquista.

O Xulgado do Social número 3 de A Coruña ditou unha sentenza que declara a nulidade do despedimento dun traballador da “Estación de Servicio Bens S.L.”, que a empresa botou despois de se acoller a un permiso por paternidade. O fallo obriga a gasolineira a readmitilo e a pagarlle os salarios de tramitación.

Os condutos de saída do sistema de ventilación do Gadis que está situado no baixo do Mercado de Montealto provocan temperaturas moi elevadas a carón da Escola Infantil Municipal do barrio, emprazada xusto ao lado deste recinto comercial. Pais e nais de alumnos protagonizan protestas todos os venres, ás 13:00 horas, para demandar unha pronta solución a este problema, que se agrava no verán. A CIG-Ensino apoia estas reivindicacións.

Técnicos da CIG xa advertiran a Inspección de Traballo, o 8 de maio, do altísimo ritmo de traballo nas obras do porto exterior coruñés, da falta de medidas de seguridade, nomeadamente nas subcontratas, e do risco moi elevado de caídas de operarios ao mar nos labores de recheo. A denuncia na Inspección interposta pola central tralo último accidente en Punta Langosteira, acontecido na madrugada do 8 de xullo, supuxo a paralización da actividade na zona do sinistro.