Ahitosa é unha empresa ourensá do metal que se caracteriza pola persecución sindical, as irregularidades e os despedimentos que sofren os traballadores e traballadoras afiliados á CIG. Dita persecución encrudécese especialmente co compañeiro Miguel, apresentado na candidatura da CIG nas eleccións sindicais de marzo do 2007, e que finalmente foi despedido o pasado 17 de novembro.

Membros da CIG-Servizos protestaron o 20 de novembro diante da nave que Bofrost, empresa dedicada á venda a domicilio de produtos conxelados, posúe no polígono coruñés de Pocomaco. Esta multinacional alemá comezou a acosar un traballador afiliado ao sindicato desde o momento en que este se presentou como candidato nas eleccións do persoal.

A Federación de Servizos de Compostela comezou o pasado 19 de novembro unha campaña de mobilizacións diante da tenda de roupa PIMKie reclamando a readmisión dunha traballadora e denunciar publicamente a situación laboral que se da nesta empresa como é traballar domingos e festivos gratis ou facer horas de balde.

O Xulgado do Social número 3 de Pontevedra declarou nulo o despedimento do traballador que a empresa Celta Prix cesou logo de presentarse como candidato pola CIG ás eleccións de persoal. Segundo se recolle na sentenza, Celta Prix deberá readmitir a Emilio Fresco Fresco no seu posto e nas mesmas condicións que tiña. Ademais, deberá aboarlle os salarios que deixou de percibir neste tempo.

A CIG-As Rías compareceu o venres 7 de novembro para denunciar a situación que están a pasar os/as traballadores/as da empresa Ambulancias Egara-Mon, T.S., S.L. Os responsables da empresa despediron a dous candidatos e coaccionaron os/as traballadores/as que tomaron parte nas Eleccións Sindicais. Dende a CIG denúnciase tamén os reiterados incumprimentos do Convenio de aplicación para as empresas e traballadores/as de transporte de enfermos e accidentados da Comunidade Autónoma de Galicia.

Foron máis de 7.000 os traballadores do sector do Metal que o 6 de novembro percorreron as rúas de Vigo para amosar a súa solidariedade cos catro traballadores do Naval, para os que a Fiscalía solicitaba catro anos de cadea pola folga do 2007 polo cumprimento do Convenio. Paro xeralizado e marchas moi numerosas visibilizaron o apoio do sector a estes catro compañeiros, e a loita que están dispostos a dar contra a represión sindical. Unha xornada de desafío a do 6 de novembro que demostra que o Metal non vai permitir ningún tipo de recorte de dereitos.