Nunha resposta á Mesa pola Normalización Lingüística, a entidade financeira a distancia ING Direct sinala que non vai utilizar o galego mentres a lexislación lingüística de Galiza non o determine taxativamente.

A Mocidade pola Normalización Lingüística, sección xuvenil da Mesa, vén de confirmar con Salvat Bruño, editora responsábel da publicación das aventuras de Astérix e Obélix para o Estado español, que os máis coñecidos guerreiros galos de todos os tempos “voltarán ao fin a falar en galego” por volta do próximo outono, previsibelmente entre outubro e novembro.

Unha trintena de persoas representativas de diferentes eidos da sociedade galega presentaron este xoves, día 23 de xullo, en Compostela o “Manifesto a prol da convivencia lingüística e da igualdade de dereitos para o galego”. Un documento no que se subliña que “é o galego o que corre perigo como idioma e os galego falantes os que non son debidamente respectados”.

A CIG-Ensino denuncia que a empresa contratada pola Consellaría de Educación para a xestión dos libros de texto obriga aos centros, cando contactan con ela telefonicamente, a dirixirse a eles en español. Esta empresa que foi licitada pola Consellaría por 450.000  € de diñeiro público galego, non só non atende aos centros escolares de Galiza no seu idioma, senón que tampouco os descarga de traballo ningún.

A Mesa pola Normalización Lingüística vén de manifestar a súa “satisfacción” pola decisión plenaria do Concello da Coruña, na cal se ratificou un decreto da alcaldía asinado xa o pasado mes de marzo, polo que a institución municipal desiste do litixio que desde 1992 vén mantendo pola súa “teimosía” de non recoñecer nin acatar a lexislación vixente en materia lingüística e toponímica.

A Mesa pola Normalización Lingüística reclama “a suspensión inmediata” da nova campaña que vén de presentar a Secretaría Xeral de Política Lingüística (SXPL) e que o diñeiro previsto para a mesma se reinvista en introducir o galego en diferentes ámbitos nos que está excluído.