A CIG-Ensino vén de denunciar que a Consellaría de Educación está obrigando a algúns centros de secundaria a deixar de impartir certas optativas que están impartindo desde principio de curso. Dende a Federación do Ensino da CIG consideran que esta medida “é inxustificable e incomprensible”, posto que ocasiona trastornos tanto “ao alumnado desas materias como aos centros que teñen que organizar de novo os horarios dese alumnado”.

A CIG-Ensino fixo entrega, no rexistro da Xunta, de 8.125 sinaturas de profesorado na mañá deste mércores 19 de novembro. As sinaturas son resultado dunha campaña que tiña como obxectivo reclamar unha serie de melloras dirixidas a garantir a calidade do ensino e as condicións laborais e profesionais do profesorado.

Ante a convocatoria de eleccións para a renovación parcial dos representantes dos distintos sectores da comunidade educativa nos consellos escolares dos centros, é especialmente grave a situación que se está a producir nos Centros Integrados de FP nos que este proceso non vai ter lugar, sen que se contemple tampouco a prórroga do mandato dos actuais membros.

A CIG-Ensino denuncia que a consellaría de Educación mantén os concertos educativos con cinco centros do OPUS DEI que reciben subvencións de máis de 2.000.000 de euros malia segregar o alumnado por razóns de sexo. A Consellaría xustificou a súa posición de non actuar até o curso vindeiro por falta de probas, cando os mesmos responsábeis destes centros e nas súas páxinas webs recoñecen que impediron a matrícula de nenos e nenas no mesmo centro.

A CIG-Ensino vén de denunciar que os/as acompañantes do transporte escolar perciben un 81 % menos do que lles correspondería, segundo o que a Consellaría lles transfire ás empresas de transporte para cubrir os gastos deste servizo. Detectáronse casos de compañías que en lugar de contratar directamente a estes/as traballadores/as e aplicarlles o Convenio de transporte de viaxeiros fano mediante empresas de servizos e retribúenos, soamente, coa parte proporcional que lles corresponde do salario mínimo interprofesional.

O Secretario Nacional da CIG-Ensino, Anxo Louzao, fixo pública a valoración da central dos orzamentos presentados pola Consellaría de Educación para o ano 2009. Estes orzamentos non só son insuficientes para avanzar na calidade do ensino senón que son os que menos medran desde a entrada do novo goberno na Xunta de Galiza. Os orzamentos da Consellaría de Educación para o ano 2009 suporían un total de 2.389 millón de euros (102 millóns máis respecto de 2008), de xeito que a Consellaría medra só un 4,45%. Para atopar índices máis baixos de crecemento hai que remontarse aos orzamentos de 2003.