A Confederación Intersindical Galega mobilizou nas manifestacións convocadas nas sete cidades, na Mariña e en Ribeira a uns 15.000 traballadores e traballadoras que se sumaron á reivindicación dun modelo xusto e sustentábel, fronte ao neoliberalismo, e a prol da soberanía nacional. A manifestación máis numerosa foi a celebrada en Vigo, onde participaron preto de 10.000 persoas.

Achegar o sindicato aos veciños e veciñas, dar a coñecer as posicións e os conflitos que se deron nestes últimos meses na comarca e facer un chamamento á necesaria participación na manifestación convocada para este Primeiro de Maio, máis dada a situación de crise económica que se nos ven enriba, son algúns dos obxectivos que levaron á CIG de Compostela a instalar unha carpa informativa na Praza Roxa.

A Confederación Intersindical Galega vén de presentar publicamente a campaña do Primeiro de Maio, Día do Internacionalismo Proletario, que se conmemora desta volta baixo o lema "Por un modelo socioeconómico xusto e sustentábel. En defensa da soberanía nacional".

A Confederación Intersindical Galega conmemora este 1º de Maio, Día do Internacionalismo Proletario, coa convocatoria de manifestacións en todas as comarcas do país, baixo o lema “Por un modelo socioeconómico xusto e sustentábel”.