O pasado 26 de xuño tivo lugar unha nova concentración de delegados e delegadas da CIG contra o proceso de reconversión do BBVA, desta volta na Oficina Principal de Lugo. Por outra banda o vindeiro día 2 de xullo está prevista unha reunión coa Consellaría de Traballo para solicitar unha implicación da Administración na defensa dos postos de traballo.

A CIG vén de anunciar a posta en marcha dunha campaña dirixida a explicar as causas da actual crise económica e en demanda da aplicación de medidas que garantan as condicións de vida da clase traballadora, que favorezan realmente aos sectores produtivos e que posibilten maior autogoberno para Galiza. Unha campaña que se quere facer chegar a todas as organizacións do nacionalismo para poder dar unha resposta común ante unha crise que vai afectar á maioría da poboación.

Os delegados sindicais de todos os sindicatos con representación na Xunta de Persoal funcionario e Comité de Empresa do persoal laboral do Concello de Santiago, xunto co persoal municipal libre de servizo ou na súa pausa regulamentaria, veñen de convocar unha manifestación na Praza do Obradoiro para este xoves, día 26 de xuño, ás 11,30 horas.

As traballadoras e traballadores do servizo de atención a emerxencias, máis coñecido como 112, iniciaron na mañá deste xoves 19 de xuño, as mobilizacións, logo de varias semanas desenvolvendo unha campaña informativa por toda Galiza que tiña como obxectivo dar a coñecer a súa situación laboral e recoller sinaturas de apoio. A súa foi unha peregrinación desde Protección Civil até San Caetano, en demanda de ser escoitadas/os tamén pola administración.

A Consellaría de Educación vai clausurar o curso o día 20 e vén de abrir a matrícula para o Bacharelato. Porén, aínda non ten aprobado o novo Decreto do currículo polo que se vai ordenar o Bacharelato para o curso vindeiro. Esta situación agrávase, aínda máis, porque o propio proxecto de Decreto derroga a Orde que regula as optativas e a Consellaría non presenta, nin sequera, o borrador dunha nova.

A CIG considera inaceptábel e completamente regresiva a proposta acordada polos ministros de Traballo da UE que pretende ampliar o tope da xornada semanal até as 65 horas. Esta medida, que nos retrotrae até comezos do século XX, precarizará aínda máis as condicións laborais dos asalariados. O sindicato nacionalista aposta pola mobilización para facer fronte a este ataque contra a clase traballadora.