O xoves 27 de novembro foi inagurado o Servizo de Migración en Lugo cunha presentación do secretario Comarcal, Xosé Ferreiro, da secretaria Confederal de Servizos, Afiliación e Migración, Elvira Patiño Ogea, do responsábel do departamento en Lugo, Alexandre Penas Roibás e do responsábel do Servizo de Migración da Coruña Xurxo Martínez Crespo.

O 17 de novembro a Executiva da CIG trasladaba a súa reunión semanal en Compostela até o local comarcal de Lugo. A data merecíao: a conmemoración do 90 aniversario do Manifesto da Asemblea Nacionalista de Lugo, un feito histórico para o nacionalismo galego. O Secretario Xeral da CIG, Suso Seixo, o secretario Confederal de Formación Sindical, Manuel Mera, e o secretario comarcal, Xosé Ferreiro, foron os encargados de lembrar esta data e presentar a exposición conmemorativa organizada pola central.

O Tribunal Superior de Xustiza de Galiza (TSXG) declarou improcedentes os 30 despedimentos de operarios da planta de Ingemarga en Guitiriz que foran botados pola empresa por negárense a traballar as fins de semana. O fallo xudicial ordena Ingemarga a readmitilos nos seus postos co conseguinte abono dos salarios de tramitación. De non aceptar esta opción, a empresa tería que indemnizalos e desembolsar preto dun millón de euros.

Preto de 200 gandeiros/as, convocados polo SLG, concentráronse o 7 de agosto en Outeiro de Rei diante da factoría de Leche Pascual, empresa que preside a "Federación Nacional de Industrias Lácteas", para demandar un prezo mínimo para o leite de 0´42 euros. Os produtores/as tamén protestaron en Lugo, fronte á delegación provincial da Consellaría de Medio Rural e ás portas de Subdelegación do Goberno español. A orixe destas mobilizacións remóntase ao mes de setembro do ano pasado.

O Colexio Maristas “La Inmaculada” de Lugo botou nos últimos días dous profesores que se solidarizaran con outros dous compañeiros que foran despedidos anteriormente. Antes de que se producisen os últimos despedimentos, a CIG-Ensino de Lugo xa alertara a Consellaría do ambiente de represión laboral existente no colexio.

O pasado 26 de xuño tivo lugar unha nova concentración de delegados e delegadas da CIG contra o proceso de reconversión do BBVA, desta volta na Oficina Principal de Lugo. Por outra banda o vindeiro día 2 de xullo está prevista unha reunión coa Consellaría de Traballo para solicitar unha implicación da Administración na defensa dos postos de traballo.