O luns día 4 de agosto reincorpóranse aos seus postos de traballo as traballadoras da exposición permanente Galicia Dixital que foran despedidas o pasado mes de maio tras pasar a xestionar a mostra a nova concesionaria, Telecyl S.A. Foron necesarios máis de dous meses de constantes mobilizacións para que se chegara a un acordo e foran readmitidas.

As traballadoras de Galicia Dixital volveron a concentrarse diante das instalacións desta exposición permanente, na Praza da Inmaculada en Compostela para, posteriormente marchar cara o edificio administrativo da Xunta de Galiza en San Caetano. Denuncian que a concesionaria depende da Secretaría Xeral de Comunicación, que a súa vez depende de Presidencia, pero que Touriño, máis alá de utilizar o tema do emprego feminino nos discursos non fai esforzo algún por solucionar a súa situación.

Esta mañá un grupo de sindicalistas da CIG realizou un peche simbólico no despacho do Subdirector Xeral de Comunicación Audiovisual, nos edificios da Xunta en San Caetano, como protesta polo despedimento de todo o cadro de persoal da exposición permanente "Galicia Dixital". O peche mantívose por unha media hora até que os sindicalistas foron desaloxados por membros da Policia Autonómica tras ser identificados.

A Secretaría Xeral de Comunicación, dependente da consellaría de Presidencia, mantén un sonoro silencio fronte as demandas de readmisión das traballadoras despedidas da exposición Galicia Dixital. Entre mentres, elas continúan a mobilizarse en demanda da readmisión, logo de oito anos de traballo continuado nesta mostra.

As traballadoras de Galicia Dixital co apoio da CIG-Servizos, amenizaron a estancia do Presidente da Xunta, Emilio Pérez Touriño, a golpe de tambor, durante o acto de celebración do Día das Letras Galegas 2008, que tivo lugar na mañá deste xoves día 15 de maio, na Casa-Museo de Rosalía de Castro en Padrón.

O pasado día 2 de maio, as 11 traballadoras da exposición Galicia Dixital, dependente da Dirección Xeral de Comunicación Audiovisual (consellaría de Presidencia), que levaban 8 anos prestando servizos para as diferentes empresas concesionarias encargadas da mostra, foron despedidas. Así o denunciaba en rolda de prensa Roberto Alonso, secretario comarcal de CIG-Servizos, quen anunciou inminentes mobilizacións e reclamou unha solución inmediata.