A CIG-Ensino informou de que a Consellería de Educación estase negando a cubrir todas aquelas baixas do profesorado que se están producindo desde o día 10 de decembro e que se produzan até o ano 2009. Dende a Federación quérese denunciar que están a prevalecer os criterios económicos por riba dos educativos.

A CIG-Ensino está promovendo escritos dos centros educativos dirixidos á Consellaría esixindo que se dote aos centros do profesorado necesario e continúa a denunciar que, neste comezo de curso, se aprecia un importante recorte de profesorado e unha deficiente resposta á reclamación dos centros, prexudicando de xeito grave a calidade do ensino. Neste intre son máis de 300 centros os que non ven cubertas as súas necesidades.

A CIG-Ensino vén de presentar un recurso contencioso administrativo ante o Tibunal Superior de Xustiza de Galiza en contra da Orde do 25 de xuño de 2008 (DOG do 27 de xuño) que estabelece a relación e o currículo das materias optativas do Bacharelato.

O Consello da Xunta aprobou o Decreto de Bacharelato no Consello da Xunta sen proceder a rectificar as graves carencias que posúe e mesmo os seus erros manifestos, que obrigarán en breve a ter que modificar o seu contido, que foi froito de atender as presións de intereses alleos ao ensino, como é o caso da xerarquía da igrexa, no canto de escoitar as demandas da comunidade educativa.

A Consellaría de Educación vai clausurar o curso o día 20 e vén de abrir a matrícula para o Bacharelato. Porén, aínda non ten aprobado o novo Decreto do currículo polo que se vai ordenar o Bacharelato para o curso vindeiro. Esta situación agrávase, aínda máis, porque o propio proxecto de Decreto derroga a Orde que regula as optativas e a Consellaría non presenta, nin sequera, o borrador dunha nova.

O Xulgado do Contencioso - Administrativo nº 1 de A Coruña ditou unha sentenza que obriga a Consellaría de Educación a incoar un expediente disciplinario ao director do IES Paseo das Pontes, Mario Juíz López, por tolerar que un grupo de alumnos insultase gravemente unha profesora do centro. A CIG-Ensino solicita da Consellaría a apertura de expediente e o cesamento inmediato de Mario Juíz.