Operarios da mina de Serrabal e das factorías de Ferroatlántica de Cee e Sabón protagonizaron un acto de protesta coincidindo coa visita do presidente do Goberno español, José Luis Rodríguez Zapatero, a un dos tramos nos que se está a construír o TAV en Boqueixón.

Traballadores e traballadoras de Serrabal e Ferroatlántica participaron este xoves 24 de xullo nunha concentración convocada para demandar os informes técnicos encargados polo ADIF nos que se avalía o impacto tanto ambiental como económico do trazado do AVE ao seu paso pola mina de Serrabal, e a súa entrega inmediata tanto aos Comités de Empresa como ao Parlamento de Galiza. Unha vez máis reiteraron a súa exixencia de cambio de trazado.

Os Comités de Empresa de Serrabal e Ferroatlántica, xunto con representantes das organizacións sindicais CIG e UGT, denunciaron -na rolda de prensa que se convocou na propia mina- a actitude do Presidente da Xunta, a quen responsabilizan do conflito e de negarse sequera a dialogar. Unha rolda de prensa atípica na que os traballadores, coa súa masiva presenza, quixeron deixar constancia de que se están alí é porque queren e que ninguén lles di como, cando, onde e por que teñen que mobilizarse, ademais de denunciar a manipulación informativa da que foron obxecto nos últimos días por parte de certos medios de comunicación.

O Secretario Xeral da CIG, Suso Seixo, vén de cualificar as declaracións do Presidente da Xunta, Emilio Pérez Touriño, respecto do papel que o empresario Villar Mir ten no conflito de Serrabal, como “insultantes” para as organizacións sindicais que están a intervir no mesmo. A CIG pregúntase ademais as razóns que se agachan tras da negativa do Presidente da Xunta a, sequera, valorar un posíbel cambio de trazado mentres asume sen problemas o resto dos que se están a aprobar e o culpa da actual situación por eludir a súa responsabilidade como Presidente.

A primeiras horas da mañá do xoves 5 de xuño, traballadores da mina de Serrabal e das plantas de Ferroatlántica de Cee e Sabón concentrábanse no banco cero da mina para intentar evitar o topografiado do terreo a partir do cal darían comezo as obras do TAV. Na mañá deste luns día 9 de xuño repetían a concentración e impedían novamente que os técnicos do ADIF tomasen posesión dos terreos, aínda que saben que nos días seguintes regresarán. Por iso xa anunciaron que continuarán coas concentracións e coa demanda de cambio de trazado malia a cada vez maior presenza policial.

Ás oito da mañá do martes 22 de abril, os traballadores da mina de Serrabal e das plantas de Ferroatlántica en Cee e Sabón, comezaban a súa andaina cara o Parlamento de Galiza desde San pedro de Vilanova, en Vedra, onde están os aceso á mina. Unha marcha de 16 quilómetros en demanda do cambio de trazado do TAV e do cumprimento do acordo parlamentario ‘unánime’ do pasado 27 de xuño de 2007.