A CIG de Ferrol valorou moi positivamente a resposta das traballadoras e dos traballadores da empresa CeltaPrix, encargada do servizo de limpeza viaria no Concello de Cedeira, durante os catro días de folga desenvoltos este nadal. Os paros foron convocados por mor dos constantes incumprimentos do convenio colectivo por parte da empresa, que mesmo chegou a despedir a un traballador de xeito arbitrario.  

A Consellería de Traballo suspendeu o Expediente de Regulación de Emprego presentado pola construtora Eshor a través do que pretendía extinguir o contrato de 150 postos de traballo. A Xunta decidiu remitir o expediente do ERE ao Xulgado do Social de Ferrol, tal e como demandara a CIG co apoio dos traballadores e traballadoras da construtora durante a reunión mantida coa Delegación de Traballo.

A CIG-Servizos vén de convocar unha folga no servizo de recollida de lixo en Cedeira para os días 30 e 31 de decembro e o 2 e 3 de xaneiro, por mor dos reiterados incumprimentos do convenio colectivo por parte da empresa concesionaria, CeltaPrix. Así mesmo, o martes 23 de decembro, está convocada unha concentración diante do Concello a partir das 12:00 horas.

CIG-Construción rexeita, ademais de considerar inaceptábel, o Expediente de Regulación de Emprego (ERE) presentado pola construtora Eshor, co que pretende extinguir o contrato de 150 obreiros. Esta federación do sindicato cualifica de escandaloso o feito de que a empresa poida despedir impunemente todos estes traballadores cando recibe cuantiosas axudas públicas para a “estabilidade no emprego”. Eshor, ademais, obtivo 10 millóns de euros de beneficios nos últimos anos.

Sindicalistas da CIG de Ferrol concentráronse diante da Oficina Técnica de Correos de Fene, o 19 de novembro, para rexeitaren o comportamento que mantén o xefe de Distribución con traballadores, nomeadamente eventuais, os que ameaza, presiona e acosa. Xa hai catro demandas xudiciais presentadas.

Un cento de traballadores e delegados de persoal de diferentes empresas do Grupo Inditex concentráronse o 22 de outubro diante da sede central da compañía, situada no polígono de Sabón (Arteixo). Os operarios protestan polo despedimento de tres empregados do almacén de Pull&Bear de Narón.