Celta Prix, empresa concesionaria do servizo de recollida do lixo e da limpeza nos concellos de Meis, Cambados e Vilanova de Arousa, despediu dous traballadores en canto tivo coñecemento de que ían ser candidatos da CIG nas eleccións do persoal. A central nacionalista, que esixe a readmisión inmediata dos compañeiros, denunciou este caso de represión sindical nos xulgados do Social.

A asemblea de traballadores do servizo de limpeza e recollida de lixo de Cedeira ratificou, o 8 de agosto, o preacordo asinado entre a empresa Celta Prix e a representación sindical sobre o primeiro convenio colectivo. A CIG-Servizos cualifica o acordo como plenamente satisfactorio ao acadar a práctica totalidade das reivindicacións do persoal. A folga ficou desconvocada.

CIG-Servizos de Ferrol convocou unha folga indefinida no servizo de recollida do lixo e limpeza viaria do Concello de Cedeira, que comezará ás 23:59 horas do 8 de agosto. As reivindicacións pasan por rematar coa discriminación salarial entre o persoal contratado e o subrogado do Concello. Os primeiros están a cobrar pouco máis do salario mínimo interprofesional.

Ás tres da mañá do xoves 24 de xullo remataba a mediación, que tiña lugar na Delegación de Traballo en Vigo, na que a empresa concesionaria do servizo de limpeza no concello de Nigrán, Cespa, aceitaba as demandas dos traballadores, que volven así aos seus postos de traballo despois de once días de folga e loita por un convenio digno.

Os case trinta traballadores da empresa concesionaria do servizo de limpeza, Cespa, comezaron este 14 de xullo a folga convocada pola negociación do convenio colectivo. Os traballadores concentráronse diante do concello para demandar a actuación da administración local neste conflito.

Os traballadores do servizo de limpeza do Concello de Nigrán anunciaron a convocatoria de folga, que terá carácter indefinido, a partir do 14 de xullo. Estes empregados demandan un convenio colectivo digno que recolla as súas demandas laborais e sociais.