A CIG de Verín vén de denunciar que o actual Convenio Colectivo para o persoal laboral ao servizo do concello de Verín contén erros de grande relevancia entre os que salientan salarios base e complementos diferentes para traballadoras/es de igual grupo e nivel profesional, vulnerando así o principio de igualdade e crebando as normas de clasificación profesional que rexen na administración pública. Por iso a CIG demanda modificacións na RTP e a convocatoria da Mesa Xeral de Negociación, previa aprobación dos orzamentos para o 2009.

O xulgado do Social nº 3 de Ourense vén de condenar á empresa Antela Estación de Servizo S.L. a indemnizar á CIG con 3.000 € por ter violado o dereito fundamental de liberdade sindical ao despedir a dúas traballadoras, candidatas da CIG, para impedir a súa concorrencia ás eleccións sindicais.

O persoal do concello de Vilariño de Conso vén de convocar unha xornada de folga para este xoves, día 24 de xullo. Demandan do goberno municipal que sente a negociar para facilitar o acordo e asinar un novo convenio colectivo, fixar as bases de contratación do persoal do concello e a Relación de Postos de Traballo. Non é a primeira vez que se mobilizan e, se non hai avances nas negociacións, xa adiantan que tampouco será a última.

O Xulgado do Social nº 1 de Ourense vén de declarar nulo o despedimento dun traballador “por vulneración dos seus dereitos fundamentais, en concreto a garantía de indemnidade que leva aperllado o dereito á Tutela xudicial efectiva e por ter sido discriminado por razóns ideolóxicas”. Segundo a sentenza o concello debe readmitilo inmediatamente e abonar os salarios que o traballador deixou de percibir.

O concello de Rairiz de Veiga foi condenado a pagar unha indemnización de máis de 13.000 euros por violación da integridade moral dun traballador municipal, segundo denuncia a CIG de Verín, por mor do comportamento do seu alcalde, Xosé Xaquín Rodríguez Ambrosio. Os feitos remóntanse ao ano 2006, cando o traballador se incorporou ao concello de Rairiz tras da disolución da Mancomunidade, onde desenvolvía a súa actividade.