A CIG-Ensino vén de presentar un recurso contencioso administrativo ante o Tibunal Superior de Xustiza de Galiza en contra da Orde do 25 de xuño de 2008 (DOG do 27 de xuño) que estabelece a relación e o currículo das materias optativas do Bacharelato.

A CIG-Ensino vén de solicitarlle á Consellaría de Educación e O.U. que rectifique canto antes a Orde de optativas publicadas o pasado 27 de xuño para que se manteñan as optativas de Literatura Galega do Século XX e tamén as de Literaturas Hispánicas e Literatura Universal Contemporánea polo grave prexuízo que causan ao sistema educativo galego.

Sesenta e tres profesores do CIFP (Centro Integrado de Formación Profesional) Monte de Conxo veñen de exixir mediante un escrito, promovido pola CIG-Ensino, o mantemento das ensinanzas do Bacharelato. Hoxe só dous centros de ensino público de Santiago imparten bacharelato tecnolóxico, entre os cales está o Centro Integrado de Formación Profesional de Conxo.

Continuando coas mobilizacións en demanda doutro decreto de bacharelato, na mañá deste mércores 21 de maio, representantes da CIG-Ensino entregaron no rexistro da consellaría de Educación, preto de 2.700 sinaturas -que veñen sumarse ás xa entregadas e que se incrementarán coas que se recollan nos vindeiros días- en apoio a esta solicitude. Previo o acto de entrega celebrouse unha concentración en San Caetano á que se sumaron alumnos de Filosofía denunciando entre outras cousas que “a consellaría mata a Filosofía”.

Máis de 4000 persoas participaron na manifestación convocada pola CIG-Ensino en Santiago, para exixir a negociación e a modificación do Proxecto de Decreto de Bacharelato. Ademais, a folga foi secundada por máis do 75% do profesorado de Educación Física, Filosofía e Historia, e tivo un apoio importante do profesorado doutras especialidades, reclamando que a relixión non se imparta no horario lectivo normal a todo o alumnado.

Anxo Louzao e Dores Fernández, secretarios nacional e da Muller de CIG-Ensino, presentaron en rolda de prensa as conclusións dun estudo sobre a participación das mulleres na dirección dos centros educativos, que evidencia a baixa presenza das mulleres na dirección dos centros, malia ser maioría no profesorado. Por iso, CIG-Ensino demanda da Consellaría de Educación que se elabore un Plan de Igualdade para o Ensino.