O Secretario Nacional da CIG-Ensino, Anxo Louzao, fixo pública a valoración da central dos orzamentos presentados pola Consellaría de Educación para o ano 2009. Estes orzamentos non só son insuficientes para avanzar na calidade do ensino senón que son os que menos medran desde a entrada do novo goberno na Xunta de Galiza. Os orzamentos da Consellaría de Educación para o ano 2009 suporían un total de 2.389 millón de euros (102 millóns máis respecto de 2008), de xeito que a Consellaría medra só un 4,45%. Para atopar índices máis baixos de crecemento hai que remontarse aos orzamentos de 2003.

A CIG-Ensino realiza un balance final negativo deste curso escolar que remata. Neste sentido, o secretario nacional da federación, Anxo Louzao, salienta que a Consellaría tivo unha actitude de falta de diálogo e de negociación, o que comportou un incremento da conflitividade, especialmente ao longo do terceiro trimestre. Os incumprimentos e a postura impositiva da titular de Educación en determinados temas foron o denominador común.

Na Mesa Sectorial de Educación celebrada este venres 20 de xuño, debatéronse, entre outros, os cadros de persoal dos centros educativos e os currículos de Técnicos en balonmán, baloncesto e atletismo. Nesta xuntanza a CIG-Ensino denunciou a falta de seriedade institucional coa que se está a desenvolver e cualificou de “inadmisíbel” que en numerosas ocasións xa, non estea presidida polo seu presidente, que non se dea resposta ás cuestión presentadas, que se realicen cambios na orde do día ou que as actas estean sen aprobar de hai meses.