O secretario nacional da Federación da Construción da CIG, Xoan Xosé Melón, participou na última semana de distintos encontros e reunións en Brasil, co movemento sindical internacional, para analizar cal é a situación dos traballadores deste sector.

A estrutura organizativa do sindicalismo brasileiro está a experimentar unha profunda transformación. A lexislación socio-laboral brasileira non recoñece xuridicamente a existencia de centrais sindicais. Herdeira en bastantes das súas características do modelo implantado polo presidente Getulio Vargas nas décadas dos 30 e 40 do século pasado e inspirada no modelo mussoliniano, esta situación vai mudar coa inminente aprobación polo Parlamento brasileiro dunha lei recoñecendo e dando atribucións ás centrais sindicais.